आइतबार तीनवटा क्षेत्रमा भएको उपनिर्वाचनका मतपेटिका संकलन भइसकेका छन्। तीनै क्षेत्रका निर्वाचन अधिकृतको कार्यालयका अनुसार लगभग सबै मतपेटिका संकलन भई गणनास्थलमा ल्याइसकिएको छ।
यी तीन क्षेत्रमध्ये तनहुँ-१ मा आज मध्यरातबाटै मतगणना सुरू हुँदैछ भने बारा-२ र चितवन-२ मा सोमबार बिहानबाट मात्र गणना हुने भएको छ।
तनहुँ-१ का मुख्य निर्वाचन अधिकृत कोमलप्रसाद आचार्यका अनुसार देवघाट गाउँपालिका अन्तर्गतका १०-१२ वटा केन्द्रबाहेक अन्य सबै ठाउँबाट मतपेटिका संकलन भई दमौली ल्याइसकिएको छ। बाँकी रहेका मतपेटिका पनि दमौली ल्याउने क्रममा बाटोमा रहेको उनले बताए।
'यसबीच केही बेरमै सर्वदलीय बैठक बस्दैछ। त्यसपछि केही प्रशासकीय प्रबन्ध मिलाएर हामी मतगणना सुरू गर्ने छौं,' उनले भने।
सबै प्रक्रिया मिलाएर मध्यरात १२ बजेसम्म मतगणना सुरू हुने उनले जानकारी दिए।
तनहुँ-१ मा व्यास र भानु गरी दुई नगरपालिका र आँबुखैरनी, बन्दीपुर र देवघाट गरी तीन गाउँपालिका छन्। यहाँ नेपाली कांग्रेसका गोविन्द भट्टराई, नेकपा एमालेका सर्वेन्द्र खनाल र राष्ट्रिय स्वतन्त्र पार्टी (रास्वपा) का स्वर्णिम वाग्लेबीच मुख्य प्रतिस्पर्धा छ।
चितवन- २ मा भने आज मतगणना सुरू नहुने भएको छ। मुख्य निर्वाचन अधिकृतको कार्यालयका सूचना अधिकारी ईश्वर आचार्यले सोमबार बिहान सर्वदलीय बैठक बसेर मतगणना सुरू हुने जानकारी दिए।
उनका अनुसार सबै निर्वाचन केन्द्रबाट मतपेटिका संकलन भई गणना स्थलमा ल्याइसकिए पनि सर्वदलीय बैठक बस्न नसकेकाले मतगणना सुरू नभएको हो।
यहाँ सर्वदलीय बैठकका लागि सबै राजनीतिक दलका प्रतिनिधि आइसकेका थिए। तर डेढ घन्टा कुर्दा पनि प्रमुख जिल्ला अधिकारी र एसपी नआएकाले बैठक बस्न सकेन। दलका प्रतिनिधिहरू भोलि बिहान मात्र बैठक बसेर गणना सुरू गर्ने भनी मतगणनास्थलबाट फर्किएका छन्।
कांग्रेस उम्मेदवार जितनारायण श्रेष्ठले धेरै बेर कुर्दा पनि प्रमुख जिल्ला अधिकारी नआएकाले आफूहरू फर्किएको जानकारी दिए।
'सिडिओलाई हामी केही प्रश्न सोध्न चाहन्छौं। उहाँले आज मतदानको दिन राष्ट्रिय स्वतन्त्र पार्टीका लागि धेरै गाडीको पास दिनुभयो। रास्वपाका नेताहरू गाडीको लावालस्करसहित हिँडे। हाम्रो निम्ति भने दुई-तीनवटा गाडीको मात्र पास उपलब्ध गराइयो। यस्तो किन भयो भनेर हामी उहाँलाई सोध्न चाहन्छौं,' कांग्रेस उम्मेदवार श्रेष्ठले भने।
रवि लामिछाने गृहमन्त्री भएका बेला चितवनका सिडिओ सरूवा भएर आएको र उनका नातेदार पनि भएकाले रास्वपाका लागि धेरै पास उपलब्ध गराइएको श्रेष्ठको आरोप छ।
कांग्रेस प्रतिनिधिहरू फर्किएलगत्तै रास्वपाका उम्मेदवार रवि लामिछाने पनि मतगणना स्थलबाट बाहिरिएका छन्। उनले पनि आज मतगणना नहुने जानकारी दिए।
दलका उम्मेदवार र प्रतिनिधिहरू फर्किएको केही बेरमै सिडिओ र एसपी आइपुगेका थिए। त्यसपछि हामीले सूचना अधिकारी ईश्वर आचार्यसँग अब के हुन्छ भनेर सोध्दा उनले सोमबार मात्र गणना सुरू हुने बताए।
यसको कारणबारे जानकारी दिँदै उनले भने, 'कसले कसलाई कुर्ने भन्ने समस्याले आज मतगणना सुरू हुन सकेन।'
चितवन- २ मा कालिका नगरपालिका र इच्छाकामना गाउँपालिकाका सबै वडा र भरतपुर नगरपालिकाका १० वडा पर्छन्।
यहाँ राष्ट्रिय स्वतन्त्र पार्टीका रवि लामिछाने, नेपाली कांग्रेसका जितनारायण श्रेष्ठ र नेकपा एमालेका रामप्रसाद न्यौपानेबीच मुख्य प्रतिस्पर्धा हुँदैछ।
उता बारा-२ मा पनि सोमबार बिहानबाट मात्र मतगणना सुरू हुने भएको छ। सबै मतदान स्थलबाट मतपेटिका संकलन भई गणना स्थलमा ल्याइए पनि भोलि बिहान ६ बजे सर्वदलीय बैठक बोलाइएको छ।
राजनीतिक दलहरूको आग्रहमै बिहान बैठक बोलाइएको सहायक निर्वाचन अधिकृत नवराज जोशीले जानकारी दिए।
'हामीले त आजै सर्वदलीय बैठक बसेर मतगणना सुरू गरौं भनेका थियौं, तर दलका प्रतिनिधिहरूले धेरै थकाइ लाग्यो, भोलि बिहान मात्र बैठक बसौं भनेर अनुरोध गरेपछि त्यही निर्णय भयो,' उनले भने।
बाराको कलैयास्थित शिक्षा विकास तथा समन्वय इकाई कार्यालयमा मतगणना स्थल राखिएको छ।
बारा-२ मा कोल्हवी नगरपालिकाको वडा नम्बर ८, महागढीमाई नगरपालिका, पचरौता नगरपालिका र सुवर्ण, देवताल, करैयामाई गाउँपालिका पर्छन्।
यहाँ सिके राउत नेतृत्वको जनमत पार्टीका शिवचन्द्र कुशवाहा, जनता समाजवादी पार्टी (जसपा) का अध्यक्ष उपेन्द्र यादव, नेकपा एमालेका पुरूषोत्तम पौडेल, आम जनता पार्टीका अरूण ज्ञवाली र राष्ट्रिय स्वतन्त्र पार्टीका रमेश खरेलबीच मुख्य प्रतिस्पर्धा हुँदैछ। यहाँ सत्ता गठबन्धनले जसपाका यादवलाई सघाएको छ।
