सिंहदरबारमा प्रधानमन्त्री पुष्पकमल दाहालसहित बसेको तीन दलका शीर्ष नेताहरूको बैठकले विभिन्न विषयमा सहमति जुटाएको छ।
प्रधानमन्त्री कार्यालयमा बसेको बैठकले संसदीय समिति, संवैधानिक परिषदसम्बन्धी विधेयक अघि बढाउने र टिआरसीबारे विशेष समितिमा छलफल गर्नेजस्ता विषयमा सहमति जुटेको हो।
छलफलमा नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओलीलगायत सहभागी थिए।
बैठकमा सहभागी एमालेका प्रमुख सचेतक पदम गिरीले बैठक सौहार्दपूर्ण र उपलब्धिमुलक रहेको पत्रकारहरूलाई बताए।
‘जे-जे विषय छलफलमा थिए ती विषय सहमतिमा पुगेको छ,’ उनले भने, ‘खासगरी संसदका विभिन्न समितिहरूका सन्दर्भमा संसदीय सुनुवाई समितिको सभापति नेपाली कांग्रेसले लिने र राज्यका निर्देशक सिद्धान्त, नीति, दायित्वको कार्यान्वयन अनुगमन तथा मूल्यांकन समितिको सभापति नेकपा एमालेले लिने सहमति भएको छ।’
प्रतिनिधि सभाका १० विषयगत समितिमध्ये नेकपा एमालेले लेखा समिति र अर्को एक समितिको सभापति पाउने सहमति भएको उनले बताए।
‘संवैधानिक परिषदसम्बन्धी विधेयक संसदबाटै पारित गर्ने सहमति भएको छ,’ उनले भने, ‘टिआरसीबारे विशेष समिति गठन गर्ने र त्यो समितिबाटै छलफल गरी अगाडि बढाउने सहमति भएको छ।’ विशेष समिति १५ सदस्यीय हुने उनले बताए।
