राष्ट्रिय स्वतन्त्र पार्टीका तर्फबाट तनहुँ क्षेत्र नम्बर १ का उम्मेदवार स्वर्णिम वाग्लेले अहिलेको मतादेश पुराना दलहरूको नेतृत्वको कार्यशैलीप्रतिको वितृष्णा रहेको बताएका छन्।
तनहुँ-१ मा अग्रता लिइरहेका वाग्लेले सञ्चारकर्मीसँग छोटो कुराकानी गर्दै यो मतादेशले नयाँ युवाहरूले नेतृत्व गरेको राजनीतिक अभियानप्रतिको आशा रहेको पनि बताए।
चुनाव जितेको अवस्थामा आफूले निर्वाचनअघि गरेको वाचाप्रति प्रतिवद्ध रहेको उल्लेख गर्दै उनले भने, ‘चुनावअघि गरेका वाचाहरू पूरा गर्न इमानदार प्रयास हुनेछ। लोकतन्त्रमा एउटा व्यक्तिले आएर जादूको छडी चलाएर चमत्कार गर्ने भन्ने कुरा हुँदैन। सबै सामूहिक रूपमा हुन्छ र प्रणालीबाटै गर्ने हो।’
तनहुँ-१ बाट रास्वपा उम्मेदवार बनेका वाग्लेले सुरूआतीदेखि अग्रता लिएका छन्।
पछिल्लो मतपरिणाम अनुसार उनी निकटतम प्रतिद्वन्द्वीभन्दा ७ हजार बढी मतले अघि छन्।
आधाभन्दा बढी मतगणना गनिसक्दा उनले १८ हजार ४६१ मत पाएका छन् भने नेपाली कांग्रेसका गोविन्द भट्टराईले १० हजार ८१४ मत प्राप्त गरेका छन्।
