कोशी प्रदेश नामाकरणको विरोधमा उत्रिएकाहरूले नेकपा एमालेका अध्यक्ष केपी शर्मा ओलीलाई कालोझन्डा देखाएका छन्।
झापाको बुद्धशान्ति गाउँपालिकाको बुधबारेस्थित रामजानकी मन्दिरनजिकै पार्टी कार्यक्रममा सहभागी भएका ओलीलाई आज कालो झन्डा देखाइएको थियो।
पहिचानवादीहरूले ओलीलाई कालोझन्डा देखाउँदै नाराबाजीसमेत गरेका थिए। 'कोशी प्रदेश चाहिँदैन' जस्ता नारा लगाउँदै उनीहरूले ओलीलाई कालो झन्डा देखाएका थिए। प्रहरीले पहिचानवादीहरूलाई सय मिटर वर नै रोकेको थियो।
कालोझन्डा देखाएको आरोपमा प्रहरीले २ जना व्यक्तिलाई पक्राउ गरेको गृहमन्त्री नारायणकाजी श्रेष्ठले प्रतिनिधि सभा बैठकमा जानकारी गराएका छन्।
एमाले सचेतक पदम गिरीले भने सत्ता पक्षका कार्यकर्ताको घुसपैठमा अध्यक्ष ओलीमाथि दुर्व्यवहार भएको बताएका थिए।
जिल्ला प्रहरी कार्यालय झापाका प्रमुख, एसपी दुर्गाराज रेग्मीले घटनामा संलग्न २ जनालाई पक्राउ गरिएको बताए।
‘एक्कासी प्रदर्शनकारीले ढुंगा प्रहार गरे। ढुंगाले लागेर प्रहरीको टाउकोमा चोट लागेको छ। प्रहरी निरीक्षक अनिल माबुहाङ र प्रहरी सहायक हवल्दार सुदीपनारायण राजवंशी घाइते भएका छन्,’ उनले भने।
प्रदेश नम्बर १ को नाम गत फागुन १७ गते कोशी राखिएको थियो। पहिचानमा आधारित नाम नराखेको भन्दै पहिचानवादीहरू आन्दोलनमा छन्।
भिडिओ:
