राष्ट्रपति रामचन्द्र पौडेलको भारतको नयाँ दिल्लीस्थित् अल इन्डिया या इन्स्टिच्युट अफ मेडिकल साइन्सेस (एम्स) मा उपचार जारी छ। राष्ट्रपतिको स्वकीय सचिवालयले बुधबार एक विज्ञप्ति जारी गर्दै यसबारे जानकारी दिएको हो।
त्यहाँका चिकित्सकहरूले पौडेलको स्वास्थ्य सुधारोन्मुख भएको बताएका विज्ञप्तिमा उल्लेख छ। उनको स्वास्थ्यसम्बन्धी केही परीक्षणको रिपोर्ट अझै आउन बाँकी रहेको चिकित्सकहरूले बताएका छन्।
राष्ट्रपति पौडेललाई छातीको संक्रमण भएको बताइएको छ।
'छातीको इन्फेक्सनका कारण त्रिभुवन विश्वविद्यालय शिक्षण अस्पताल, महाराजगञ्जमा भर्ना भई लगातार एन्टिबायोटिक चलाउँदा पनि प्रभावकारी नभएपछि चिकित्सकहरूको सुझावअनुसार उहाँको भारतीय सरकारी अस्पताल एम्समा उपचार भइरहेको सर्वविदितै छ,' विज्ञप्तिमा भनिएको छ, 'सम्माननीय राष्ट्रपतिको नेपालमै उपचार गर्ने चाहना हुँदा हुँदै पनि चिकित्सकहरूको टोली तथा सम्माननीय प्रधानमन्त्री र उच्च राजनीतिक नेतृत्वको विषेश आग्रहमा उहाँ भारतमा उपचारका लागि जान तयार हुनुभएको हो। यो कुरा सम्माननीय प्रधानमन्त्रीले सार्वजनिक कार्यक्रममा नै बताइसक्नुभएको यथार्थ यहाँ स्मरण गराउन चाहन्छौं।'
स्वकीय सचिवालयले सरकारको निर्णयबमोजिमको उपचार पद्दति कानुन, नियम र निश्चित विधिअनुसार हुने स्पष्ट हुँदा हुँदै पनि राष्ट्रपति संस्थालाई नै विवाद पार्ने मनसायले केही सञ्चारमाध्यम तथा सामाजिक सञ्जालमा फैलाइएका भ्रामक सूचना र दुष्प्रचारप्रति गम्भीर ध्यानाकर्षण भएको पनि जनाएको छ।
विज्ञप्तिमा भनिएको छ, 'राष्ट्रपति तथा उपराष्ट्रपतिको पारिश्रमिक तथा सुविधासम्बन्धी ऐन, २०७४ मा विदेश भ्रमण र उपचारका लागि विदेश जाने विषयलाई अलग–अलग व्यवस्था गरिएको प्रष्ट छ। तर ऐन-कानुन नै नबुझेजस्तो गरी सम्माननीय राष्ट्रपतिका परिवारका सदस्यले दैनिक भ्रमण भत्ता पाउनेजस्ता आम नागरिकलाई दिग्भ्रमित पार्ने सूचना सम्प्रेषण भइरहेकोप्रति हामी दुःख व्यक्त गर्छौं। यसप्रकारका भ्रामक सूचना र दुष्प्रचारको पछि आम नेपाली दिदीबहिनी तथा दाजुभाइहरू लाग्नु हुने छैन भन्नेमा हामी विश्वस्त छौं।'
