सामान्य प्रशासन तथा संघीय मामिलामन्त्री अमनलाल मोदीले सरकारी कर्मचारीहरूले सरकारको नीतिअनुसार काम नगर्दा जनताको आक्रोश राजनीतिक दलमाथि खनिएको बताएका छन्।
शुक्रबार काठमाडौंमा नेपाल आयल निगम कर्मचारी संघको नौ राष्ट्रिय महाधिवेशनमा बोल्दै मन्त्री मोदीले यस्तो बताएका हुन्।
उनले सरकारी कर्मचारीहरूले सरकारको नीति अनुसार जनतालाई दिने सार्वजनिक सेवा सहज रूपमा दिन नसक्दा आलोचना आउने गरेको भन्दै कर्मचारीहरूले जनता सकारात्मक हुनेगरी काम गर्न आग्रह गरे।
उनले पछिल्लो उपनिर्वाचनको परिणाम कर्मचारीहरूले सरकारले दिएका सेवाहरूको जनतालाई सकारात्मक बनाउन नसक्दाको परिणाम भएको उल्लेख गरे।
मन्त्री मोदीले विभिन्न राजनीतिक आन्दोलनबाट बनेका राजनीतिक दलका नेताहरूको संघर्षलाई समेत कर्मचारीहरूले काम नगर्दा उनीहरूको योगदान पानीको फोकाजस्तै फुटेर जाने अवस्था देखिएको बताए।
उनले सरकारले गरेका काम कर्मचारीमार्फत् जनतामा सकारात्मक रूपमा जान नसक्दा जनताले विकल्पहरू खोज्न थालेको उल्लेख गरे।
उनले भने, ‘राजनीतिक दलहरूले निर्वाचनको बेलामा उठाएका एजेण्डाहरू सरकारमा आएपछि कार्यान्वयन गर्ने सरकारी कर्मचारीहरू हो। कर्मचारीहरूले सरकारको नीति सही तरिकाले कार्यान्वयन गर्नुभएन भने सरकारको विभिन्न तवरबाट आलोचना हुने गर्छ। जनताहरू तत्काल सेवा चाहन्छन्। कर्मचारीहरूले सार्वजनिक सेवा समयमा नदिँदा त्यसको अर्को राजनीतिक दलमाथि गर्दोरहेछ। विभिन्न राजनीतिक आन्दोलनबाट बनेका राजनीतिक दलका नेताहरू विभिन्न संघर्ष गरेका हुन्छन्।’
उनले अघि थपे, ‘तर कर्मचारीहरूले काम नगर्दा उनीहरूको योगदान पानीको फोकाजस्तै फुटेर जान्छन्। सरकारले गरेका काम कर्मचारीहरूमार्फत् जनतामा सकारात्मक नजाँदा विकल्प खोज्न थालेका हुन्छन्। अहिले देखिएको छ। सरकारले गरेका काम कर्मचारीहरूले सही तरिकाले काम नगर्दा जनतामा गएको नकारात्मक सन्देशले विभिन्न तवरबाट प्रकट भइरहेको छ।’
मन्त्री मोदीले अहिले नै जादूको छडीबाट समाज परिर्वतन हाल्ने जस्तो सोच र दृष्टिकोणबाट जनमत बिग्रन थालेको बताए।
‘मानौं अहिले नै जादूको छडीबाट समाज परिवर्तन भइहाल्छ। त्यस्तो किसिमको सोच र दृष्टिकोणबाट जनमत बिग्रने गर्छ। कर्मचारीहरूले सत्य कुरा के हो भनेर जनताहरूलाई नबुझाउँदा अहिले हामीभन्दा उमेरले पाको लागि युवा नेता देख्छन्। उहाँहरू कुनै अन्तरिक्षबाट आएका होइनन्। कुनै नयाँ फ्याक्ट्रीबाट आएका होइनन्। यही समाजको उत्पन्न भएका मान्छेहरू हुन्। तर उनीहरूले मात्रै गर्छन् भन्ने समाज हल्ला छ।’
उनले कर्मचारीहरूले सत्य कुरा जनतालाई बुझाउन नसक्दा आफूभन्दा उमेरले पाकालाई युवा नेता देख्न थालेको टिप्पणी गरे।
उनले जनताले भगवान ठानेकाहरू कुनै अन्तरिक्ष वा नयाँ फ्याक्ट्रीबाट आएका नभएर यही समाजको उत्पन्न भएका मान्छेहरू भएकाले उनीहरूले मात्रै गर्छन् भन्ने भ्रममा पर्न नहुने बताए।
