प्रतिनिधि सभामा रहेका नेकपा एमालेका सांसद लक्ष्मी महतो कोइरीबारे प्रतिनिधि सभाको आगामी अधिवेशनबाट कानुनबमोजिम निर्णय लिने समझदारीपछि प्रतिनिधि सभाको अवरोध हटेको छ।
शुक्रबार दिउँसो बसेको प्रतिनिधि सभा बैठकमा सभामुख देवराज घिमिरेले दस वटाभन्दा धेरै बैठकमा अनुपस्थित भएका सांसद कोइरीले अस्वस्थ रहेको पत्र पठाएको उल्लेख गर्दै सभाले उनको बिदा स्वीकृत गरेको घोषणा गरेका थिए।
तर सत्तारूढ सांसदहरूले उनको बिदा स्वीकृत नभएको भन्दै बैठकमा अवरोध गरेका थिए।
जनकपुर उच्च अदालतले पुर्पक्षका लागि थुनामा राख्न आदेश गरेका सांसद कोइरी लामो समयदेखि फरार रहँदै आएका छन्। सांसद कोइरी फरार भएकाले उनलाई अस्वस्थ भनेर प्रतिनिधि सभाले स्वीकृत गर्न नहुने अडान सत्तारूढ सांसदहरूले लिएका थिए।
त्यसपछि सभामा सत्तापक्ष र प्रतिपक्षबीच वादविवाद भएको थियो। शुक्रबार साँझ ५ बजे स्थगित भएको बैठक राति दस बजे मात्र बस्यो।
राति दस बजेको बैठकमा सभामुख घिमिरेले 'मनोरमा शेरचन, बिनाकुमारी थनेत, चन्द्रकान्त भण्डारी र वर्षमान पुनको बिदा सभाबाट स्वीकृत भएको' जानकारी गराएका थिए।
'लक्ष्मी महतो कोइरीका बारेमा सभामा विभिन्न विषय उठेकाले यसबारे प्रतिनिधि सभाको आगामी अधिवेशनमा कानुनबमोजिम हुने जानकारी गराउँछु,' सभामुख घिमिरेले भने।
त्यसपछि सत्तारूढ सांसदहरूले सहमतिमा टेबल ठोकेका थिए।
राति १० बजेको बैठकमा सभामुख घिमिरेले प्रतिनिधि सभाको पहिलो अधिवेशनमा भए गरेका कामकारबाहीको विवरण प्रस्तुत गरेका थिए। लगत्तै प्रतिनिधि सभाको अधिवेशन अन्त्यको पत्र पढेर सुनाएका थिए।
