राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले महावीर पुनसँग सरकारले तत्काल सम्झौता गर्नुपर्ने बताएका छन्।
आइतबार माइतीघरस्थित धर्नास्थल पुगेर लिङ्देनले धर्नामा ऐक्यवद्धता जनाउँदै सरकारले तत्काल पुनसँग संवाद गरी सम्झौता गर्नुपर्ने बताए।
‘यो देश र जनताको भविष्यसँग सम्बन्धित विषय हो। सरकारले तपाईंले हाम्रो आँखा खोलिदिनुपर्यो धन्यवाद छ भनेर सरकारले भन्नुपर्थ्यो,’ लिङ्देनले भने, ‘सरकारले पुनका माग सम्बोधन नगरेसम्म पुनको धर्नामा हाम्रो ऐक्यवद्धता र साथ रहन्छ।’
सरकारले आविष्कारका क्षेत्रलाई प्राथमिकतामा राख्न कुनै पनि तर्क र बाहनामा नलागी एकछिन पनि ढिला नगरी पुनसँग सम्झौता गर्नुपर्ने बताए।
‘यो विषय प्रधानमन्त्रीले अघि बढाउन सक्नुहुन्छ। संसदमा लगिराख्नुपर्ने छैन,’ उनले भने, ‘कुनै ऐनले बाधा सिर्जना गर्यो भने संशोधन गरौंला।’
सरकारले अयोग्य लडाकु र औषधि उपचारमा करोडौं खर्च गरिरहेकोले आविष्कारका लागि बजेट बिनियोजन गर्न सक्ने पनि उनले बताए।
‘सरकारले ढिलो नगरोस्। ७२ घन्टा भइसक्यो धर्ना बसेको तैपनि सरकार नदेखेजस्तो गरिरहेको छ,’ उनले भने, ‘सरकारले जबसम्म कान र आँखा खोल्दैन तबसम्म ध्यानाकर्षण गरिरहन्छौं।’
उनले पुनले उठाएका विषय कुनै एउटा पार्टी र व्यक्ति विषयको भन्दा पनि देशकै कुरा भएको बताए।
