नेपाली कांग्रेसका महामन्त्री गगनकुमार थापाले कांग्रेसभित्र यतिखेर रूवाबासी गर्ने समय नभई सरकारमा पाएको जिम्मेवारी पूरा गर्ने समय भएको बताएका छन्।
नेपाल ट्रेड युनियन कांग्रेस भक्तपुरको सातौं जिल्ला अधिवेशनको सोमबार उद्घाटन गर्दै उनले पार्टीका नेता, कार्यकर्ताले कांग्रेसको भविष्यबारे चिन्ता गर्नेभन्दा पनि पाएको जिम्मेवारी इमानदारीपूर्वक पूरा गर्नुपर्ने बेला आएको बताएका हुन्।
'आम निर्वाचन आउन बाँकी चार वर्षमा कांग्रेसले पाएका केन्द्रीय मन्त्रालय, प्रदेश सरकार र जितेका पालिका तथा वडामा परिणाम आउने गरी काम गरेर जनताको मन जित्न सक्नुपर्छ,' महामन्त्री थापाले भने, 'उपनिर्वाचनको परिणामले पार्टीको अवस्था के होला भनेर चिन्ता गर्ने होइन कि सरकार यसरी पो चलाउनुपर्छ भन्ने हिम्मत बटुल्नुपर्छ।'
उनले 'जो जहाँ छौं, त्यहीँ राम्रो काम गर्नुपर्छ' भन्दै पार्टीका नेताहरूले अर्को पटक मौका पाइएला/नपाइएला भनेर चिन्ता गर्नुभन्दा अहिले पाएको मौकाको सदुपयोग गर्नुपर्ने बताए। नभए फेरि मौका पाइँदैन भन्ने बुझेर काम गर्नुपर्नेमा पनि जोड दिए।
'अहिलेको आर्थिक संकटका बेला गजबसँग अर्थ मन्त्रालय चलाएर देखाउन सक्नुपर्छ। कांग्रेसले अहिले नेतृत्व गरेको हजारौं वडा छन्, केन्द्रको सरकार छ। सातवटा प्रदेशको सरकारमा कहीँ सहभागी भएका छौं, कहीँ नेतृत्व गरिरहेको छौं। तिनमा अझै चार वर्षको समय छ,' उनले भने, 'त्यहाँ प्रतिबद्ध भएर काम गरौं।'
सरकारमा हुँदा काम नगरेर नागरिकको मन जित्न नसक्ने हो भने फेरि सरकारमा दोहोर्याएर किन जाने भन्नेमा चिन्ता गर्नुपर्यो भन्दै उनले थपे, 'देशका तीन सय २९ वटा पालिकामा कांग्रेसले जितेको छ। त्यहाँ आत्मविश्वासका साथ चार वर्ष राम्रो काम गर्न सकेनौं भने फेरि हामीले काम गर्ने मौका किन पाउने?'
परिणाम देखाउने गरी सुशासनका साथ काम गरे रूवाबासी गर्नै पर्दैन भन्दै उनले आफूहरू कहाँनिर चुकेको हो, सच्याउन पार्टीमा छलफल, समीक्षा र आत्ममूल्यांकन गरिरहेको बताए। नेतृत्व लगायत पार्टीमा बस्ने सबैले कमजोरी सच्याएर अगाडि बढे पाटी ठीक ठाउँमा आउने पनि उनले बताए। पार्टीभित्रको समस्या पहिचान गरी समाधानको बाटोतर्फ अगाडि बढ्न आवश्यक रहेको उनको भनाइ थियो.
कार्यक्रममा नेपाल ट्रेड युनियन कांग्रेसका केन्द्रीय वरिष्ठ उपाध्यक्ष महेन्द्र यादव, महासचिव योगेन्द्र कुँवर, पूर्वअध्यक्ष खीलानाथ दाहाल, छापाखाना तथा सम्बद्ध श्रमिक संघका केन्द्रीय अध्यक्ष सुवर्णजंग सिजापती, निवर्तमान जिल्ला अध्यक्ष विष्णु खड्का लगायतले श्रमसम्बन्धी मौलिक हकलाई व्यवहारमै कार्यान्वयन गर्न स्वदेशमा रोजगारीको पर्याप्त अवसर उपलब्ध गराई श्रमिकको ज्ञान, सीप र ऊर्जा देश विकासमा लगाउनपर्ने बताए। ट्रेड युनियन कांग्रेस भक्तपुरको सातौं जिल्ला अधिवेशनले लक्ष्मीशोभा प्रजापतिको अध्यक्षतामा नयाँ कार्य समिति चयन गरेको छ।
