जनता समाजवादी पार्टीका अध्यक्ष उपेन्द्र यादवले सरकारमा मन्त्री पठाउने विषय पार्टीले बसेर निर्णय गर्ने बताएका छन्।
मंगलबार प्रतिनिधिसभा सदस्यको शपथ ग्रहणपछि सञ्चारकर्मीसँग कुराकानी गर्दै उनले सरकारमा जाने विषयमा हतार गर्नुनपर्ने बताएका हुन्।
मन्त्री बन्नुहुन्छ ? भन्ने सञ्चारकर्मीको जिज्ञासामा उनले भने, ‘सरकारमा जाने कुरा पार्टीले बसेर निर्णय गर्छ। त्यसमा के हतार गर्ने?,’ उनले भने, ‘सरकारमा जानुपर्ने हुन्छ, त्यसमा अन्यथा छैन। मेरो कुरा छाड्दिनुस्। सरकारको स्थिरता र कार्यशैली महत्त्वपूर्ण हो। मन्त्रालय महत्त्वपूर्ण कुरा होइन।
नवनिर्वाचित प्रतिनिधिसभा सदस्य यादवले सरकारको स्थायित्वका लागि सके राष्ट्रिय सहमति, नसके वृहत्तर सहमति आवश्यक रहेको बताए। छ–छ, नौ–नौँ महिनामा सरकार परिवर्तन हुँदा नागरिकमा वितृष्णा र नैराश्यता उत्पन्न हुने भएकाले वृहत् राष्ट्रिय सहमति आवश्यक रहेको बताएका हुन्।
‘सरकारलाई पहिले स्थिरता दिने, दोस्रो कुुरा संसदीय समितिहरू पहिले नै भइसक्नु पर्ने थियो, भएको छैन, त्यसलाई यथाशीघ्र पूर्णता दिनुपर्छ। संसदीय समितिले नै संसदीय प्रणालीको कार्यकारी अंग हो, त्यसलाई गतिशिल बनाउनुपर्छ,’ उनको जोड थियो।
