प्रधानमन्त्री पुष्पकमल दाहाल ‘प्रचण्ड’ ले सत्तारूढ गठबन्धन दलको बैठक बोलाएका छन्।
प्रधानमन्त्री निवास बालुवाटारमा आज दिउँसो ३ बजे गठबन्धनको बैठक बोलाइएको प्रधानमन्त्री दाहालका प्रेस विज्ञ मनोहरि तिमिल्सिनाले बताएका छन् ।
‘नीति तथा कार्यक्रम नै आजको छलफलको मुख्य विषय हो,’ उनले सेतोपाटीसँग भने, ‘त्यसका अतिरिक्त मन्त्रिपरिषद्लाई पूर्णता दिने विषयमा पनि कुराकानी हुनेछ।’
यस्तै, गठबन्धनमा रहे पनि सरकारमा सहभागी नभएका दललाई समावेश गरेर मन्त्रिपरिषद् विस्तार गर्ने विषयमा छलफल हुने उनले बताए।
पछिल्लो समय राष्ट्रिय स्वतन्त्र पार्टी (रास्वपा)लाई सरकारमा सहभागी गराउनेबारे प्रधानमन्त्री प्रचण्ड छलफलमा छन्। उनले केही दिनअघि रास्वपा सभापति रवि लामिछानेलाई सरकारमा आउन औपचारिक प्रस्ताव गरिसकेका छन्। त्यस्तै कांग्रेस सभापति शेरबहादुर देउवा र लामिछानेबीच पनि मंगलबार भेटवार्ता भएको छ।
सरकारमा जाने, नजानेबारे छलफल गर्न रास्वपाले शुक्रबार पार्टी केन्द्रीय कमिटी र संसदीय दलको संयुक्त बैठक बस्दैछ।
