नेपाली कांग्रेसको महासमिति बैठकमा बिहीबार समूहगत छलफलमा उठेका सुझावलाई प्रदेश सभापतिहरूले बन्द सत्रमा प्रस्तुत गर्ने क्रम सुरू भएको छ।
ललितपुरको गोदावरीमा भएको महासमितिमा उठेका सुझावलाई केन्द्रीय पदाधिकारीसहितको बन्द सत्रमा प्रस्तुत गरिएको हो।
बैठकमा उपसभापति पूर्णबहादुर खड्काले प्रस्तुत गरेको नीति प्रस्ताव, महामन्त्री गगन थापाले प्रस्तुत गरेको सांगठनिक प्रस्ताव, महामन्त्री विश्वप्रकाश शर्माले प्रस्तुत गरेको समसामयिक राजनीतिक प्रस्ताव, अर्थमन्त्री प्रकाशशरण महतले प्रस्तुत गरेको आर्थिक प्रतिवेदन र लेखा समिति संयोजक श्याम घिमिरेले प्रस्तुत गरेको लेखा परीक्षण प्रतिवेदनमाथि महासमिति सदस्यहरूले चार समूहमा रहेर समूहगत छलफल गरेका थिए।
महासमिति सदस्यहरूले गठबन्धनको विषय, सामाजिक तथा आर्थिक मुद्दाहरू, शिक्षा, स्वास्थ्य र रोजगारी लगायतका विषयमा कांग्रेसले विशेष पहल गर्नुपर्ने सुझाव प्रस्तुत गरेका छन्।
सबै प्रस्ताव निर्णायार्थ पेश गरेपछि आजै महासमिति बैठक समापन हुनेछ।
