जनप्रतिनिधिहरूले आफ्नो कार्यकक्षमा राष्ट्रपति र प्रधानमन्त्रीको फोटो राख्ने चलन नयाँ होइन।
दाङका एक वडाध्यक्षले भने भ्रष्टाचार मुद्दामा दोषी ठहर भएका कांग्रेसका दिवंगत नेता खुमबहादुर खड्काको फोटो प्रधानमन्त्री बालेन शाहसँगै आफ्नो कार्यकक्षमा टाँगेका छन्।
यो घटना दाङको घोराही उपमहानगरपालिका–८ को हो।
नेकपा एमालेबाट निर्वाचित वडाध्यक्ष जितेन्द्रबहादुर शाहले मंगलबार आफ्नो कार्यकक्षमा प्रधानमन्त्री शाहसँगै खुमबहादुर र राष्ट्रनिर्माता पृथ्वीनारायण शाहको फोटो राखेका हुन्।
वडाध्यक्ष शाहले खुमबहादुरको फोटो आफ्नो सामाजिक सञ्जालमा पनि सार्वजनिक गरेका छन्। उनले फोटोसँग कुनै विवरण लेखेका छैनन्। तर उनको पोस्टमा धेरैले सकारात्मक टिप्पणी गरेका छन्।
खुमबहादुरका छोरा तथा कांग्रेस केन्द्रीय सदस्य एवं लुम्बिनी प्रदेशसभा सदस्य अनुराग खड्काले पनि वडाध्यक्ष शाहले राखेको फोटो आफ्नो सचिवालयको पेजबाट सेयर गर्दै सम्मानका लागि धन्यवाद दिएका छन्।
हामीले उनलाई आफ्नो कार्यकक्षमा खुमबहादुरको फोटो राख्नुको कारण सोधेका छौं।
वडाध्यक्ष शाहले खड्का दाङको विकासका लागि योगदान दिएका नेता भएकाले उनको फोटो आफ्नो कार्यकक्षमा टाँसेको बताए।
'उहाँले दाङ र दंगाली जनताका लागि धेरै काम गर्नुभयो,' उनले भने, 'उहाँ कांग्रेसको नेता भए पनि समस्या लिएर जो भेट्न गए पनि कहिल्यै कसैलाई भेदभाव गर्नुभएन। बेरोजगारीको अवस्थामा पनि सबैका समस्या समाधान गर्न सक्ने उहाँ मेरा लागि आदर्श व्यक्ति हो।'
सोमबार फोटो बनाउन दिएर मंगलबार कार्यकक्षमा टाँसेको उनले बताए।
भ्रष्टाचार मुद्दामा दोषी ठहर भएका नेतालाई आदर्श मान्नुको कारणबारे सोध्दा शाहले व्यक्तिगत रूपमा हरेक मानिसमा कमजोरी हुन सक्ने बताए।
'व्यक्तिगत रूपमा हरेक मानिसका केही कमजोरी हुन सक्छन् र त्यस्ता कमजोरी मेरा पनि होलान्,' उनले भने, 'जनताले खुमबहादुरलाई कहिल्यै हराएनन्। अब दाङले खुमबहादुरजस्तो नेता पाउन मुस्किल छ।'
शाहले आफू सानै हुँदा चुनाव क्रममा तत्कालीन ढिकपुर गाविसमा आएका खुमबहादुरलाई टाढैबाट देखेको पनि बताए। आफ्नो कार्यकक्षमा उनको फोटो राखेको विषयमा कुनै सरकारी निकायबाट फोन नआएको उनले स्पष्ट पारे।
वडाध्यक्षले सरकारी कार्यकक्षमा दिवंगत कांग्रेस नेताको फोटो राखेको विषयमा घोराहीका मेयर नरूलाल चौधरीले भने आपत्ति जनाएका छन्।
सरकारी कार्यालयमा राष्ट्रपति र प्रधानमन्त्रीको फोटो राख्ने चलन रहेको भन्दै उनले कुनै दल–विशेषका नेताको फोटो सरकारी कार्यकक्षमा राख्नु उचित नहुने बताए।
'कोही नेता–विशेषका तस्बिर आफ्नो निजी घरमा टाँस्न मिल्यो, तर सरकारी कार्यालयमा होइन,' एमाले नेता चौधरीले भने।
दाङका प्रमुख जिल्ला अधिकारी निश्चल पाण्डेले भने सरकारी कार्यकक्षमा कुनै नेताको फोटो राख्न नपाइने स्पष्ट व्यवस्था आफूलाई थाहा नभएको बताए।
'यसको तस्बिर राख्न पाइन्न भन्ने कहीँ लेखेको छैन,' उनले भने।
कतिपय सरकारी कर्मचारीले आफ्नो कार्यकक्षमा आमाबुबाको फोटोसमेत राख्ने गरेको उनको भनाइ छ।
यो पनि:
१० महिनापछि कार्यालय फर्किएका वडाध्यक्ष
