सदस्यहरूलाई पार्टीको जीवन तथा नीतिगत विषयमा जानकारी दिलाउने उद्देश्यले नेकपा एमाले लुम्बिनीले सदस्यहरूको परीक्षा लिएको छ।
एमाले लुम्बिनीले प्रदेशका ८६ हजार बढी सदस्यहरूको परीक्षा लिएको हो।
प्रदेशका १२ वटै जिल्लाका १०९ वटा पालिकाका ८६ हजार २ सय ६० जना सबै सदस्यहरूको सोमबार एकैपटक परीक्षा लिइएको एमाले लुम्बिनी प्रदेश कमिटी अध्यक्ष राधाकृष्ण कँडेलले बताए।
सदस्यता लिएर पनि पार्टीका गतिविधिमा सहभागी नहुने निष्क्रिय सदस्यहरूलाई क्रियाशील बनाउन पहिलो पटक यस प्रकारको कार्यक्रम थालिएको अध्यक्ष कँडेलले बताए।
सोमबार लिइएको आन्तरिक परीक्षामा पार्टी सदस्यहरूको उत्साहपूर्वक सहभागिता भएको कँडेलले बताए।
सम्बन्धित जिल्ला कमिटीको संयोजनमा लिइएको परीक्षाका लागि वडा कमिटीका कार्यालयहरूलाई परीक्षा केन्द्र तोकिएको थियो।
प्रदेश अध्यक्ष कँडेलका अनुसार परीक्षामा नेकपा एमालेसँग सम्बन्धित प्रश्नहरू सोधिएको थियो।
एमाले सचिव तथा प्रदेश इन्चार्ज पद्मा अर्यालले पार्टीका निष्क्रिय सदस्यलाई क्रियाशील र जबाफदेही बनाउन लुम्बिनी प्रदेशबाट पहिलो पटक यस प्रकारको कार्यक्रम सुरू गरिएको बताइन्।
सदस्यहरूले परीक्षामा लेखेको उत्तरको आधारमा क्षमता मापन गरी उनीहरूलाई जिम्मेवारी दिन सहज हुने उनले बताइन्।
प्रदेश इन्चार्ज अर्यालले पहिलो पटकको परीक्षामा अनुत्तीर्ण भएकाहरूलाई स्कुल विभागमार्फत् प्रशिक्षण दिइने जानकारी दिइन्।
प्रदेशका सबै पालिकामा परीक्षा सञ्चालन गरिएको भए पनि केही वडामा रोकिएकाले सोमबारको परीक्षामा कति सहभागी भए भन्ने तथ्यांक आइनसकेको अध्यक्ष कँडेलले बताए।
![uml-lumbini-exam-(2)-1710778686.jpg](https://www.setopati.com/uploads/posts/uml-lumbini-exam-(2)-1710778686.jpg)
![uml-lumbini-exam-(1)-1710778686.jpg](https://www.setopati.com/uploads/posts/uml-lumbini-exam-(1)-1710778686.jpg)
![uml-lumbini-exam-(5)-1710778686.jpg](https://www.setopati.com/uploads/posts/uml-lumbini-exam-(5)-1710778686.jpg)
![uml-lumbini-exam-(3)-1710778685.jpg](https://www.setopati.com/uploads/posts/uml-lumbini-exam-(3)-1710778685.jpg)
![uml-lumbini-exam-(6)-1710778685.jpg](https://www.setopati.com/uploads/posts/uml-lumbini-exam-(6)-1710778685.jpg)