जनमत पार्टीले पदाधिकारीहरूलाई आफ्नो सामाजिक सञ्जालमा हरेक दिन पार्टी वा नेतृत्वबारे एउटा सकारात्मक पोस्ट गर्नुपर्ने निर्देशन दिएको छ।
आइतबार केन्द्रीय सचिवालयको निर्णायानुसार आफ्ना पदाधिकारीहरूलाई जिम्मेवार, अनुशासित र दीर्घकालीन रूपमा सफल बनाउनका लागि सकारात्मक प्रचार-प्रसारमा अनिवार्य जोड्न र त्यसलाई अनुगमन समेत गर्ने निर्णय गरेको जनमतले जनाएको छ।
केन्द्रीय सचिवालयका निर्णय यसप्रकार छन्ः
१. पार्टीका सम्पूर्ण पदाधिकारीहरूले सामान्यतया हरेक दिनपार्टी वा नेत्तृत्वको विषयमा एक सकारात्मक पोस्ट सामाजिक सञ्जाल (फेसबुक, ट्विटर/एक्स, टिकटक आदि) मा गर्नुपर्नेछ।
२. पार्टीका केन्द्रीय सदस्य, प्रदेश सदस्य र जिल्ला मूल समितिका सदस्यहरूहरूले सो पोस्ट गरे वा नगरेको एउटा सामाजिक सञ्जाल अनुगमन समितिले अनुगमन गर्ने र मासिक रूपमा प्रतिवेदन पेस गर्नेछ। मासिक रूपमा २० वा बढी पोस्ट आए राम्रो, १०-२० आए औसत, ३-१० पोस्ट आए सामान्य र ३ भन्दा कम पोस्ट आए निष्क्रिय मानिनेछ। सो मूल्यांकन अन्य जिम्मेवारी तोक्दा प्रयोग गरिनेछ। राम्रो गर्नेलाई पुरस्कृत गर्ने तथा निष्क्रिय हुनेलाई एक तह घटुवा गर्ने वा जिम्मेवारीबाट हटाउनेसम्मको सिफारिस गर्न सकिनेछ।
३. पार्टीका केन्द्रीय सदस्य, प्रदेश सदस्य र जिल्ला मूल समितिका सदस्यहरूहरूले २०८१ पुस मसान्तसम्ममा आ-आफ्नो सामाजिक सञ्जालको आइडी सामाजिक सञ्जाल अनुगमन समितिलाई जानकारी गराउनुपर्नेछ।
४. पार्टीका पदाधिकारी तथा सदस्यहरूले सामाजिक सञ्जाल वा सार्वजनिक रूपमा पार्टीको विरूद्धमा अभिव्यक्ति दिने, बोल्ने/लेख्ने वा पार्टीको छविमा आँच आउने वा पार्टीलाई अहित हुने गतिविधि गर्नु हुँदैन। सो गरेमा पार्टीको विधान अनुसार कारबाही हुने प्रावधान छ। पार्टीका कमीकमजोरीहरू वा पार्टीका पदाधिकारी, सभासद वा मन्त्रीहरूविरुद्ध कुनै कुरा भएमा पार्टीका गुनासो सुन्ने सम्बन्धित पदाधिकारी समक्ष, वा पार्टीको आन्तरिक बैठकमा अनुशासित भएर राख्नुपर्छ। वा, लिखित रूपमा आफ्नो तहको समिति वा अन्तिममा केन्द्रीय अनुशासन समितिको ध्यानाकर्षण गराउनुपर्छ।
५. पार्टीको सदस्य हुनु भनेको एउटा जिम्मेवारी हो। त्यसैले पार्टीको सदस्य भएमा पार्टीबाट लाभ मात्रै खोज्ने होइन कि पार्टी प्रति आफ्नो जिम्मेबारी पनि निर्वाह गर्नुपर्ने हुन्छ। पार्टीमाथि कुनै पनि तरीकाले आक्रमण भएमा सदस्यले प्रतिरक्षा पनि गर्नुपर्छ।
पार्टीको कुनै पदाधिकारी वा मन्त्रीप्रति तपाईंको गुनासो भएमा वा उहाँहरूले तपाईंको कार्य नगरिदिँदा आक्रोशित भएर पूरै पार्टीलाई नै बदनाम हुने गरी सामाजिक सञ्जालमा पोस्ट गर्ने वा सो किसिमका गतिविधि गर्ने कार्य गर्नु हुँदैन। पार्टी भनेको हामी सबै सदस्यहरूको साझा हो। पार्टीका कुनै २-४ पदाधिकारी गलत भयो वा पार्टीका कुनै सभासद वा मन्त्रीले तपाईंले भनेअनुरूप काम गरिदिएन भन्दैमा पार्टी नै खराब हुने भन्ने कुरा हुँदैन। त्यसैले सदस्यले सदैव पार्टीको हितको सकारात्मक कुरा गर्नुपर्छ। —
