अमेरिकामा राष्ट्रपति डोनाल्ड ट्रम्पको लोकप्रियता खस्केर दोस्रो कार्यकालकै सबैभन्दा कम बिन्दुमा पुगेको छ।
अन्तर्राष्ट्रिय समाचार संस्था रोयटर्स र इप्ससले गरेको सर्वेक्षणले राष्ट्रपति ट्रम्पको लोकप्रियता खस्केर ३८ प्रतिशत बिन्दुमा झरेको देखाएको हो।
अर्थात सर्वेक्षणमा सहभागीमध्ये ३८ प्रतिशतले मात्रै ट्रम्पलाई राष्ट्रपतिका रूपमा अनुमोदन गरेका छन्।
यो रेटिङ ट्रम्प दोस्रो कार्यकालका लागि राष्ट्रपति निर्वाचित भएयताकै सबभन्दा कम हो। यसले धेरै अमेरिकीहरू ट्रम्पको कार्यशैलीप्रति असन्तुष्ट रहेको देखाउँछ।
अमेरिकी जनतामा रिपब्लिकन पार्टीको पकड क्रमशः कमजोर बन्दै गएको पनि सर्वेक्षणले देखाएको छ।
रोयटर्स र इप्ससले चार दिनसम्म गरेको सर्वेक्षणमा दुई कारणले ट्रम्पको लोकप्रियता खस्केको देखाउँछ —
पहिलो कारण हो, महँगी नियन्त्रणमा ट्रम्पको असफलता।
दोस्रो कार्यकालको सुरूआतमै ट्रम्पले भन्सार दर बढाएर आयातमा कडाइ गरे। चीनसँग त व्यापार युद्ध नै गरे। आयातमा कडाइ भएपछि अमेरिकामा दैनिक उपभोग्य वस्तुहरूको मूल्य आकासियो। यसले मध्यमवर्गका अमेरिकीहरूमा सरकारप्रतिको धारणा नकारात्मक बनायो।
सर्वेक्षणमा सहभागीमध्ये २६ प्रतिशतले मात्र ट्रम्पले अमेरिकीहरूको जीवनयापनको लागत व्यवस्थापनमा राम्रो काम गरिरहेको बताएका छन्। यो यस महिनाको सुरूमा गरिएको सर्वेक्षणको तुलनामा ३ प्रतिशत बिन्दुले कम हो।
रोयटर्सका अनुसार सर्वेक्षणमा सहभागी ६५ प्रतिशत मानिसहरूले महँगी नियन्त्रणमा ट्रम्पको कार्यशैलीप्रति असन्तुष्ट रहेको बताएका छन्।
ट्रम्पले पदभार ग्रहण गरेदेखि नै मुद्रास्फितिको दर इतिहासकै उच्च बिन्दुमा पुगेको रोयटर्सले जनाएको छ।
चर्को आलोचनापछि ट्रम्पले गत साता कफी, मासु, केरा र अन्य दैनिक उपभोग्य वस्तुहरूमा लगाइएको आयात कर घटाउने निर्णय गरेका थिए।
ट्रम्पको लोकप्रियता खस्कनुको दोस्रो कारण हो, जेफ्री एपस्टिनसँगको सम्बन्ध।
कुनै बेला ट्रम्पकै साथी रहेका एपस्टिनले बालबालिकहरूलाई वेश्यावृत्तिमा लगाएको कसुरमा जेल सजाय भोगरहँदा जेलभित्रै आत्महत्या गरेका थिए।
एपस्टिन र उनकी बेलायती प्रेमिका गलिन म्याक्सवेलले विश्वका धनाढ्य र शक्तिशाली व्यक्तिहरूका लागि 'कलिला किशोरीहरू व्यवस्था गर्ने' गरेको भनेर केही दशकयता चर्चा हुँदै आएको छ।
अमेरकी अखबार 'द वाल स्ट्रिट जर्नल' ले केही महिनाअघि एपस्टिनसँग ट्रम्पको सम्बन्धबारे नयाँ खुलासा गरेको थियो।
एपस्टिनको ५०औं जन्मदिनमा उनलाई शुभकामना सन्देश पठाएको भनेर वाल स्ट्रिट जर्नलले खुलासा गरेपछि ट्रम्पको चर्को आलोचना हुँदै आएको छ। उनकै दल रिपब्लिन पार्टीभित्र पनि एपस्टिनसँगको सम्बन्धलाई लिएर ट्रम्पको आलोचना भएको थियो।
केही दिनअघि मात्र ट्रम्पको नाम लिएर एपस्टिनले विभिन्न व्यक्तिलाई इमेल गरेको रिपोर्ट सार्वजनिक भएको थियो।
ती इमेलबाट एपस्टिनले ट्रम्पलाई पनि आफ्नो 'धन्दा' को ग्राहक बनाएका थिए भनेर शंका गर्ने प्रशस्त तथ्य भेटिएको भनेर विभिन्न अन्तर्राष्ट्रिय सञ्चार माध्यमहरूले जनाएका छन्।
यसबाट पनि ट्रम्पको लोकप्रियता खस्केको रोयटर्सले जनाएको छ।
एपस्टिन मामिलालाई ट्रम्पले कसरी सम्हाले भन्ने विषयमा रोयटर्स र इप्ससले सर्वेक्षण गरेको थियो।
यसमा ट्रम्पले राम्ररी व्यवस्थापन गरे भन्ने पक्षमा २० प्रतिशतले मात्र समर्थन गरेका छन्। सर्वेक्षणमै सहभागी भएकामध्ये ४४ प्रतिशतले मात्र ट्रम्पले एपस्टिन प्रकरणलाई राम्ररी सम्हाल्न नसकेको भनेका छन्।
सर्वेक्षणमा सहभागी ७० प्रतिशतले ट्रम्प सरकारले एपस्टिनका ग्राहकहरूबारे जानकारी लुकाएको भनेका छन्। त्यसो भन्नेमा ८७ प्रतिशत डेमोक्र्याट र ६० प्रतिशत रिपब्लिकन समावेश रहेको रोयटर्सले जनाएको छ।
एपस्टिन प्रकरणमा ट्रम्पले अमेरिकी न्याय विभागले गरेको अनुसन्धानका फाइल सार्वजनिक गर्ने भने पनि लामो समय रोकेर राखेका थिए।
दबाब बढेपछि ट्रम्पले एपस्टिनबारे दस्तावेज सार्वजनिक गर्ने विधेयकमा भोट हाल्न रिपब्लिकन सांसदलाई पनि निर्देशन दिएका छन्।
समग्र विषयमा ट्रम्पको अनुमोदनमा ९ प्रतिशत बिन्दुले गिरावट आएको रोयटर्सले जनाएको छ।
दोस्रो कार्यकाल सम्हालेको केही महिनामै भएको सर्वेक्षणमा ४७ प्रतिशतले ट्रम्पलाई अनुमोदन गरेका थिए।
पहिलो कार्यकालमा ट्रम्पको सबभन्दा कम अनुमोदन दर ३३ प्रतिशत नजिक थियो। यो भनेको पूर्वराष्ट्रपति जो बाइडेनको सबभन्दा कम अनुमोदन दरभन्दा २ प्रतिशत कम हो। बाइडेन सरकारको सबभन्दा कम अनुमोदन दर ३५ प्रतिशत थियो।
ट्रम्पको लोकप्रियता उनकै दलभित्र पनि खस्केको सर्वेक्षणको निचोड छ।
यसअघि ८७ प्रतिशत रहेको रिपब्लिकन मतदाताहरूमाझ ट्रम्पको अनुमोदन दर घटेर ८२ प्रतिशतमा झरेको छ।
लामो राजनीतिक करियरमा धेरै सङ्कटहरूबाट जोगिएका ट्रम्पका लागि यो पार्टीभित्रको समर्थनमा आएको ठूलो ह्रास हो।
स्वतन्त्र रणनीतिकार माइक ओंस्टाडले ट्रम्पको यो संकटलाई उनको दोस्रो कार्यकालकै ठूलो परीक्षा भनेका छन्। यसले घट्दो आगामी वर्षको कंग्रेसको चुनावमा रिपब्लिकनहरूलाई थप कमजोर बनाउन सक्ने अनुमान गरिएको छ।
-1746009348.jpg)
