नेपाली कांग्रेसको केन्द्रीय सदस्य पुष्पा भसालले विशेष महाधिवेशन माग गर्ने ५४ प्रतिशत महाधिवेशन प्रतिनिधिको हस्ताक्षरको सम्मान गर्न भृकुटीमण्डपमा आयोजना भएको विशेष महाधिवेशनमा सहभागी भएको बताएकी छिन्।
'५४ प्रतिशत हस्ताक्षर जब कांग्रेस केन्द्रीय कार्यालयमा दर्ज भयो, हामी कांग्रेसका ३० जना केन्द्रीय सदस्य हाम्रै नेताहरूको घरदैलोमा गयौं,' भुसालले भनिन्, 'हामीले विधान स्मरण गराउन खोज्यौं। विशेष अधिवेशन हुनुपर्छ भनेर घरघरमा गयौं। निराश भएर फर्केर आउनुपर्ने अवस्था भयो। त्यसैले हामी ५४ प्रतिशतभन्दा बढी महाधिवेशन प्रतिनिधिको सम्मानका लागि उपस्थित भएका हौं।'
भुसाल सहित ३० जना केन्द्रीय सदस्यले कांग्रेस सभापति शेरबहादुर देउवा लगायतका नेताहरूको घरघर पुगेर पार्टीमा एकता कायम राख्न आग्रह गरेका थिए।
'हाम्रो पार्टी विधानको धारा १७ (२) लाई लिएर विधानभन्दा बाहिर कोही नेता र कार्यकर्ता जान सक्दैन भन्न यहाँ उपस्थित भएका छौं,' भुसालले भनिन्, 'हामी कांग्रेस विधि विधान अनुसार अघि बढोस् भन्ने चाहान्छौं।'
भुसालले कांग्रेस अब गुटबाट मुक्त हुनुपर्ने, कृपाबाट अलग हुनुपर्ने बताइन्।
'एकता र संयुक्त साहसका साथ, नयाँ सोचका साथ एकताबद्ध भएर अघि बढ्न देशभरका नेतृत्वलाई संयुक्त तागत लिएर महाधिवेशनबाट गाउँ गाउँमा जाऔं,' भुसालले भनिन्, 'गाउँमा बसेका दिदीबहिनीहरू काम गर्दै गर्दा नेताहरूको वरिपरि घुम्न नपरोस्। विशेष महाधिवेशनमा हामी ३० जना केन्द्रीय सदस्यसँगै रहने छौं।'
-1746009348.jpg)
