सप्तकोशी नदीमा भएको यात्रुबाहक पानीबोट दुर्घटनाको कारण र घटनाको यथार्थ पत्ता लगाउन कोशी प्रदेश सरकारले छानबिन समिति गठन गरेको छ।
मंगलबारको प्रदेश मन्त्रिपरिषद् बैठकले प्रदेश सचिव आस्मान तामाङको संयोजकत्वमा समिति गठन गर्ने निर्णय गरेको कोशी प्रदेशका आन्तरिक मामिला तथा कानुनमन्त्री गोम्बु शेर्पाले जानकारी दिए।
समितिलाई घटनाको अध्ययन तथा छानबिन गरी सात दिनभित्र प्रतिवेदन बुझाउन समय दिइएको छ।
आइतबार दिउँसो धनकुटा, भोजपुर र उदयपुरको संगमस्थल त्रिवेणीस्थित सप्तकोशी नदीमा यात्रुबाहक पानीबोट दुर्घटना भएको थियो । दुर्घटनामा तीन जनाको मृत्यु भएको थियो भने तीन जना अझै बेपत्ता छन्।
बेपत्ताको खोजी तथा उद्धार कार्यलाई तीव्र बनाउन सम्बन्धित निकायलाई तत्काल आवश्यक पहल गर्न अनुरोध गर्ने निर्णय पनि मन्त्रिपरिषद् बैठकले गरेको मन्त्री शेर्पाले बताए।
बैठकले मुख्य न्यायाधिवक्ताको कार्यालयको आर्थिक वर्ष २०८२/८३ को वार्षिक प्रतिवेदन कोशी प्रदेशसभामा पेस गर्ने निर्णयसमेत गरेको छ।
त्यस्तै, कोशी प्रदेश समन्वयात्मक पर्यटकीय सेवा कक्ष तथा हटलाइन सञ्चालन निर्देशिका, २०८३ लाई स्वीकृति दिएको मन्त्री शेर्पाले जानकारी दिए।
