प्रचण्ड र माधव नेपालले लिए शपथ, केन्द्रीय सदस्यहरूले पनि आजै लिने (तस्बिरहरू)

सेतोपाटी संवाददाता

काठमाडौं, पुस २९

नेपाली कम्युनिस्ट पार्टी (नेकपा) का संयोजक पुष्पकमल दाहाल 'प्रचण्ड' र सहसंयोजक माधवकुमार नेपालले शपथ लिएका छन्।

पार्टी केन्द्रीय कार्यालय पेरिसडाँडामा अहिले जारी कार्यक्रममा उनीहरूले पार्टीका ज्येष्ठ सदस्य नन्दकुमार प्रसाईंसँग शपथ लिएका हुन्। यही कार्यक्रममा केन्द्रीय सदस्यहरू घोषणा हुनेछन् र उनीहरूलाई संयोजक प्रचण्डले शपथ ग्रहण गराउने छन्।

मंगलबार घोषणा हुने केन्द्रीय समिति झन्डै २५ सय आकारको हुने नेकपाको उपत्यका विशेष प्रदेश अध्यक्ष जगत सिंखडाले जानकारी दिए।

'२४९९ जना केन्द्रीय सदस्य घोषणा हुने हो। आज घोषणा हुने केन्द्रीय सदस्यहरू महाधिवेशन आयोजक कमिटी सदस्यका रूपमा हुनेछन्,' उनले सेतोपाटीसँग भने।

कात्तिक १९ गते नेकपा एकीकृत समाजवादीसहित १० वटा घटकहरूबीच एकता भएर गठन भएको नेकपामा १७ भन्दा बढी घटक र व्यक्तिहरू समाहित भएका छन्।

यो पार्टीमा वामदेव गौतम, भीम रावल, राजेन्द्र श्रेष्ठदेखि नागरिक उन्मुक्तिका रञ्जिता श्रेष्ठसम्म समाहित भएको छ। आइतबार मात्र मनिष लिम्बू नेतृत्वको लिम्बुवान क्रान्तिकारी पार्टी र जसपा उपाध्यक्ष शिवलाल थापाको समूह नेकपामा समाहित भएका थिए।

कात्तिक १९ गते पार्टी एकता घोषणा हुँदा ६ महिनाभित्र महाधिवेशन गर्ने र केन्द्रीय कमिटीको आकार १९९ सदस्यीय बनाउने सहमति थियो।

'केन्द्रीय कमिटीको आकार पछि १९९ सदस्यीय नै रहनेछ। अहिले घोषणा हुने केन्द्रीय सदस्यहरू महाधिवेशन आयोजक कमिटीको सदस्यका रूपमा रहनेछन्,' सिंखडाले भने।

उनका अनुसार केन्द्रीय समितिमा पूर्वमाओवादी केन्द्रबाट ६० प्रतिशत सदस्यहरू समावेश गरिएको छ। बाँकी ४० प्रतिशत एकीकृत समाजवादीसहित अन्य दलहरूबाट छानिएको उनले बताए।