नेपाली कांग्रेसका नेता शेखर कोइराला पक्षको भेलामा सहभागी अधिकांश नेताहरूले पार्टीलाई एकताबद्ध बनाएर चुनावमा होमिनुपर्ने बताएका छन्।
निर्वाचनको मुखमा विवाद बढाउनुभन्दा कांग्रेसलाई एकताबद्ध बनाएर लैजानुपर्नेमा उनीहरूले जोड दिएका हुन्।
दोस्रो विशेष महाधिवेशनमार्फत निर्वाचित सभापति गगन थापा नेतृत्वको टिमसँग मिलेर अघि बढ्नुको विकल्प नभएको शेखर पक्षका नेताहरूले बताएको भेलामा सहभागी नेताहरूले जानकारी दिएका छन्।
काठमाडौंको बत्तिसपुतलीमा आज भइरहेको भेलामा नेताहरूले धारणा राखिरहेका छन्।
भेलामा आफ्ना कुरा राख्ने सबैजसो नेताहरूले पार्टी विवादलाई अड्डा अदालततिर लैजानेभन्दा मिलेर चुनावमा जानुपर्नेमा जोड दिएको भेलामा सहभागी कांग्रेस विराटनगर महानगर सभापति दीपक चापागाइँले जानकारी दिए।
भेलामा बोल्दै नेता शिव हुमागाईंले कांग्रेस लोकतान्त्रिक दल भएको र आपसी विवाद संवादबाट हल गर्दै चुनावमा एकताबद्ध भएर जानुपर्ने बताएका थिए।
‘अब अड्डा अदालत गएर निर्वाचनको मुखमा विवाद बढाउनतिर जान नहुने उहाँको भनाइ थियो,’ चापागाइँले भने, ‘मोरङ सभापति डिगबहादुर लिम्बू, सुनिल शर्मा, नेता दिनेश कोइरालालगायत सबैको एकै धारणा रह्यो।’
सभापति चापागाइँका अनुसार नेताहरूले बोल्ने क्रम जारी छ। भेलामा नेता शेखरसहित नेताहरू मीनेन्द्र रिजाल, धनराज गुरूङ, जीवन परियार, बलबहादुर केसी, गोविन्दराज पोखरेल, रामकृष्ण यादव, दीपक गिरी लगायत सहभागी छन्।
निर्वाचन आयोगले विशेष महाधिवेशनबाट निर्वाचित कार्यसमितिलाई मान्यता दिएको छ। निवर्तमान सभापति शेरबहादुर देउवा पक्ष यसको विरोधमा सर्वोच्च अदालतमा रिट लिएर पुगेको छ। तर कोइराला पक्षका नेताहरू भने रिट दिन सर्वोच्च गएका थिएनन्।
पार्टीलाई एकताबद्ध राख्न र चुनावमा भाग लिन कोइराला पक्षका नेताहरूले नेता शेखरलाई पनि आग्रह गरिरहेका छन्। भेलामा सहभागी जिल्ला सभापतिहरुले पनि विशेष महाधिवेशनबाट निर्वाचित नेतृत्वलाई साथ दिएर अघि बढ्नुपर्ने बताएको चापागाइँले जानकारी दिएका छन्।
-1746009348.jpg)
