पूर्वप्रधानमन्त्री बाबुराम भट्टराई गोरखा क्षेत्र नम्बर २ बाट चुनाव उठ्ने भएका छन्।
भट्टराईले आफू गोरखा २ बाट उम्मेदवार हुने निर्णयमा पुगेको सेतोपाटीलाई बताए।
भट्टराई प्रगतिशील लोकतान्त्रिक पार्टीबाट उम्मेदवार हुन लागेका हुन्।
‘मलाई बिदा गर्नुहोस् न भनेर मैले भनेको हुँ तर यहाँ (गोरखा) मा साथीहरूले निकै जोडबल गर्नुभयो, एकचोटि त उठ्नुपर्यो, कामहरू बाँकी छन् भन्नुभयो,’ भट्टराईले सेतोपाटीसँग भने, ‘आम मतदाता र अरू पार्टीका साथीहरूको पनि सुझावअनुसार ठिकै छ नि त भनेर चुनाव उठ्ने निर्णयमा पुगेँ।’
प्रलोपाबाट आँखा चुनाव चिह्नमा आफू निर्वाचन लड्ने पनि उनले जानकारी दिए।
भट्टराई आज गोरखा गएका थिए। प्रगतिशील लोकतान्त्रिक पार्टीका नेताहरूले भट्टराईलाई चुनाव लड्न सुझाव दिएका थिए।
प्रलोपाको भेलाले पूर्वप्रधानमन्त्री तथा पार्टीका संरक्षक भट्टराईलाई गोरखा २ बाट उम्मेदवार बनाउने निर्णयसमेत गरेको छ।
भट्टराई २०६४ र २०७४ सालमा गोरखा २ बाट उम्मेदवार भई विजयी भएका थिए। २०७० सालको दोस्रो संविधान सभा निर्वाचन भने उनले गोरखा १ बाट विजयी भएका थिए।
२०७९ को चुनावमा भट्टराई गोरखा २ मा उम्मेदवार भएनन्।
उनले पुष्पकमल दाहाल 'प्रचण्ड' लाई उक्त क्षेत्र छाडेका थिए। त्यसबेला कांग्रेस र माओवादीलगायत दलहरूबीच गठबन्धन भएको थियो, प्रचण्डले चुनाव जितेका थिए।
भट्टराई २०६४ सालदेखि अहिलेसम्म पनि महिनामा कम्तीमा एक पटक गोरखा पुगेर नेता कार्यकर्ता तथा जनतासँग कुराकानी गर्ने गरेका छन्।
जेनजी आन्दोलनपछि भट्टराईले आफू अब चुनाव नलड्ने बताउन थालेका थिए। तर प्रलोपाका नेता कार्यकर्ताहरूको दबाबमा उनी फेरि गोरखा २ बाट चुनाव लड्ने निर्णयमा पुगेका छन्।
-1746009348.jpg)
