मनोनयन गर्ने अन्तिम तयारीमा रहेको बेला टिकट नपाएपछि नेपाली कांग्रेसका नेता प्रमोद कुमार यादवले नेकपा एमालेबाट उम्मेदवारी दर्ता गरेका छन्।
मंगलवार बिहानसम्म रुपन्देही ४ मा नेपाली कांग्रेसबाट उम्मेदवारी दिने गरी निर्णय गरेको भए पनि टिकट आशुतोष मिश्रलाई दिएपछि यादव एमाले प्रवेश गरी उम्मेदवार बनेका हुन्।
एमाले रूपन्देहीका अध्यक्ष यज्ञ गैरेले पार्टीमा प्रवेश गरेसँगै यादवलाई एमालेबाट रूपन्देही-४ को उम्मेदवार बनाइएको बताए।
यसअघि एमालेबाट सुनिता ठटेर र हजरत अलीको नाम उम्मेदवार बन्ने चर्चामा थिए।
ठटेर उम्मेदवार बन्न अनिच्छुक देखिएपछि एमालेले मंगलबार अलीलाई उम्मेदवार बनाउने तयारी गरेको थियो। तर, अन्तिम समयमा यादव एमाले प्रवेश गरेपछि उनलाई नै उम्मेदवार बनाइएको हो।
यादव २०७४ सालको प्रतिनिधिसभा निर्वाचनमा सोही क्षेत्रमा नेपाली कांग्रेसबाट निर्वाचित भएका थिए। २०७९ सालको निर्वाचनमा भने लोकतान्त्रिक समाजवादी पार्टीका सर्वेन्द्रनाथ शुक्लाले यादवलाई पराजित गरेका थिए।
रुपन्देहीका अन्य क्षेत्रभन्दा ४ मा एमालेको संगठन कमजोर रहेकोले यादवको प्रवेशले सो क्षेत्रमा संगठन बलियो बन्ने एमाले नेताहरूले प्रतिक्रिया दिएका छन्।
एमालेबाट उम्मेदवारी दिएपछि यादवले अन्तिम समयमा आफूलाई नेपाली कांग्रेसले अन्याय गरेपछि बाध्य भएर अर्को बाटो हिँड्नु परेको बताए। ‘मंगलबर बिहानसम्म मलाई टिकट दिने निश्चित जस्तै थियो तर, एकाएक अर्कैलाई टिकट दिएपछि आफूमाथि अन्याय भएको महसुस गरी त्यही पार्टीमा बस्न सकिन', उनले भने।
-1768902949.jpg)
-1746009348.jpg)
