केपी शर्मा ओली र बालेन शाहको चुनावी भिडन्तले झापा–५ धेरैको आकर्षण केन्द्र बनेका बेला झापाकै अर्को क्षेत्र पनि उत्तिकै रोचक चुनावी प्रतिस्पर्धाको थलो बनेको छ।
झापा–२ त्यस्तो क्षेत्र भएको छ, जहाँबाट विघटित प्रतिनिधिसभाका सभामुख, उपसभामुख र एक जना सदस्य गरी तीन जना आपसमा भिड्दै छन्।
यहाँ सभामुख देवराज घिमिरेले एमालेबाट, उपसभामुख इन्दिरा रानाले रास्वपाबाट र विघटित प्रतिनिधिसभा सदस्य सरिता प्रसाइँले नेपाली कांग्रेसबाट उम्मेदवारी दर्ता गराएका छन्।
उनीहरू तीन जना बाहेक नेपाली कम्युनिस्ट पार्टी र राप्रपाबाट पनि चर्चित अनुहार यहाँको चुनावी मैदानमा छन्।
संविधानसभा सदस्य रहिसकेकी माओवादी नेता धर्मशीला चापागाईं नेपाली कम्युनिस्ट पार्टीबाट उम्मेदवार बनेको यो क्षेत्रमा अघिल्लो निर्वाचनमा सभामुख घिमिरेका निकट प्रतिस्पर्धी भद्रप्रसाद नेपाल (स्वागत नेपाल) राप्रपाबाट उम्मेदवार बनेका छन्।
२०७९ को निर्वाचनमा स्वतन्त्र उम्मेदवारी दिएर दोस्रो भएका नेपाल यसपटक राप्रपाबाट उम्मेदवार बनेका हुन्।
विघटित प्रतिनिधिसभाका मुख्य दुई पदमा रहेका नेता, सदस्य पदमा रहेकी प्रसाइँको उम्मेदवारीले मात्र होइन, प्रत्यक्ष रुपमा तीन जना चर्चित महिला नेताहरू एकै क्षेत्रमा उम्मेदवार बनेको ठाउँ पनि भएको छ झापा २।
विघटित संसदमा उपसभामुख रहेकी राना र कांग्रेसकी प्रसाइँ समानुपातिकबाट चुनिएका थिए। अनाथ बालबालिकाको क्षेत्रमा काम गरेर ख्याति आर्जन गरेकी रानालाई रास्वपाले संसद पुर्याएको थियो।
नेविसंघबाट राजनीति गरेर कांग्रेसमा स्थापित भइसकेकी प्रसाइँ पनि समानुपातिक सूचीबाटै सदनमा पुगेकी थिइन्।
यसपटक नेकपाबाट उम्मेदवार बनेकी धर्मशीला चापागाईंले २०६४ को पहिलो संविधानसभा निर्वाचनमा झापा–४ मा कांग्रेस नेता चक्र बास्तोलालाई पराजित गरेकी थिइन्।
यसपटक नाताले उनै बास्तोलाकी भान्जीसमेत रहेकी कांग्रेसकी सरिता प्रसाइँ पनि धर्मशीलाको एक जना प्रतिस्पर्धी बनेकी छन्।
सभामुख देवराज घिमिरे एमाले अध्यक्ष ओलीका विश्वासपात्र मानिन्छन्। लामो राजनीतिक योगदान र पृष्ठभूमि भएका उनलाई एमालेले सभामुख बनाएको थियो।
२०७९ मा यही क्षेत्रबाट २८ हजार ७१६ मत पाएर उनले जित हासिल गर्दा स्वतन्त्र उम्मेदवार बनेका स्वागत नेपालले २६ हजार ४५५ मत पाएका थिए।
झापा–२ का राप्रपा उम्मेदवार नेपाल पत्रकारिता हुँदै वकालत पृष्ठभूमिका हुन्। उनी २०६२–६३ को जनआन्दोलनताका राजाविरूद्ध चर्को भाषामा लेख लेख्ने पत्रकार थिए।
पूर्वराजा ज्ञानेन्द्रले हालका राप्रपा अध्यक्ष राजेन्द्र लिङ्देनलाई झापा जिविसको सभापतिमा मनोनित गरेपछि नेपालले नेपाल समाचारपत्रमा 'मेची क्याम्पसमा राम थापा सिमेन्टी भएछ' शीर्षकमा लेख लेखेका थिए, जहाँ उनले राम थापाको हत्यामा लिङ्देन सहभागी भएको आरोप लगाएका थिए।
२०४६ सालमा मेची क्याम्पसमा नेविसंघका विद्यार्थी राम थापा मारिएका थिए। त्यसको दोष तत्कालीन राष्ट्रवादी विद्यार्थी मण्डलका नेताहरूमाथि लागेको थियो।
स्वागतले आफूले काम गर्ने अखबारमा त्यस्तो लेख लेखेपछि राजेन्द्र लिङ्देनले झापाको पूर्वाञ्चल दैनिकमा 'के बुझ्छ स्वागत नेपाल' भन्ने शीर्षकमा जबाफी लेख लेखेका थिए।
यसरी एकअर्काविरुद्ध लेखालेख गर्ने उनीहरू अन्ततः एकै दलमा मात्र होइन, लिङ्देनकै हातबाट टिकट लिएर चुनाव लड्ने निधोमा पुगेका छन्।
झापाको चर्चित सहर बिर्तामोड, अर्जुनधारासहितको यो क्षेत्रमा यसपटक १ लाख ३४ हजार ९१ मतदाता छन्। यही क्षेत्रबाट श्रम संस्कृति पार्टीले केशव भण्डारीलाई अघि सारेको छ।
२०७० को निर्वाचनमा झापा–२ मा कांग्रेसका सुधीर सिवाकोटीले जितेका थिए भने २०७४ मा एमालेकी पवित्रा खरेलले जितेकी थिइन्। २०७९ मा भने गठबन्धन गर्दा कांग्रेस उम्मेदवारविहीन थियो। कांग्रेसले त्यस बेला माओवादीका हरि रानालाई सघाएको थियो।
२०७९ मा समानुपातिकतर्फ एमाले नै यहाँ पहिलो भएको थियो। एमालेले २६ हजार ४९० मत पाउँदा रास्वपाले दोस्रो धेरै मत पाएको थियो। उसले २२ हजार ५१७ मत पाएको थियो।
कांग्रेसले १५ हजार ४९८, राप्रपाले ७ हजार ८ सय ८०, माओवादीले ३ हजार ८ सय ६९ र एकीकृत समाजवादीले १ हजार ६९ मत पाएका थिए।
-1746009348.jpg)
