डा. निकोलस भुसाल (कमल भुसाल) ले रुपन्देहीबाट स्वतन्त्र उम्मेदवारी दिएका छन्। रुपन्देही निर्वाचन क्षेत्र नं. २ बाट उनले उम्मेदवारी दर्ता गरेको बताए।
मंगलबार दिउँसो निर्वाचन अधिकृतको कार्यालय पुगेर फागुन २१ गते हुने प्रतिनिधिसभा सदस्यका लागि स्वतन्त्र रूपमा उम्मेदवारी दर्ता गरेको भुसालले बताए।
जुत्ता चिह्न लिएर चुनावी प्रतिस्पर्धामा उत्रिएका भुसालले राजनीतिक दलहरूले युवाहरूका समस्या समाधान नगर्ने भएकोले आफूले स्वतन्त्र रूपमा उम्मेदवारी दिएको बताए।
जेनजी आन्दोलनका सहिद परिवार तथा घाइतेहरूको माग, प्रदेश खारेजी, प्रत्यक्ष निर्वाचित कार्यकारी प्रधानमन्त्री, विदेशमा रहेकाहरूले पनि मतदान गर्न पाउनेजस्ता माग राखेका छन्।
काठमाडौंमा बेलाबेला गरिरहने आन्दोलनमा सरकारविरुद्ध उत्तेजक अभिव्यक्ति दिएका कारण उनी पक्राउ समेत परेका छन्।
भुसालले आगामी निर्वाचनमा पनि आफूले पहिलेदेखि उठाउँदै आएका मागहरूलाई चुनावी एजेन्डाको रूपमा अगाडि सारेको बताए।
‘मेरा चुनावी एजेन्डाहरू पहिलेदेखि नै स्थापित एजेन्डा हुन्, त्योसँगै स्थानीय स्तरमा लुम्बिनी प्रादेशिक अस्पताललाई मेडिकल कलेज बनाउने, ज्योतीनगर पहिरो नियन्त्रण, तिनाउ खोलामा फालिँदै आएको बुटवलको फोहोरलाई मोहरमा परिणत गर्ने तथा यस क्षेत्रका पहाडी जिल्लाहरूमा उत्पादित वस्तुको बजार व्यवस्थापनका मुद्दालाई अगाडी बढाएको छु, उनले भने।
उनले आफूलाई धेरै राजनीतिक दलहरूले उम्मेदवार बन्न आग्रह गरे पनि राजनीतिक दलको घेराभित्र रहेर चुनाव लड्नुभन्दा स्वतन्त्र रूपमा उम्मेदवार बन्द जनताका एजेन्डा बोक्न सकिने भएकोले स्वतन्त्रबाट उठेको बताए।
२०७९ सालको निर्वाचनमा पनि स्वतन्त्रबाट यही क्षेत्रबाटै उम्मेदवारी दिएका भुसालले यस पटक पनि राजनीतिक दलहरूभन्दा बाहिर रहेर स्वतन्त्र रूपमा उम्मेदवारी दिएको बताए।
अघिल्लो निर्वाचनमा दिएको उनको उम्मेदवारीलाई निर्वाचन आयोगले योग्यता नपुगेको भन्दै खारेज गरिदिएको थियो।
-1746009348.jpg)
