दाङको क्षेत्र नम्बर १ मा नेपाली कम्युनिस्ट पार्टी (नेकपा) का उम्मेदवार मेटमणि चौधरीविरूद्ध पूर्वमुख्यमन्त्री कुलप्रसाद केसी (सोनाम) ले विद्रोह गरेका छन्।
केसीले चुनावी प्रचार प्रसार सुरू गरिसकेका छन्।
सेतोपाटीसँगको संवादमा आफू बुधबार सिसहनीयास्थित चौधरी गाउँमा प्रचार प्रसारको लागि पुगेको प्रतिक्रिया दिए।
‘तँ आइस् तराई भोट दिन्छौं भन्ने कुरा यहाँका चौधरीले गर्नुभएको छ,’ उनले भने, ‘तँ राम्रो मान्छे होस् हामीले पार्टी नहेरी राम्रो मान्छे हेर्छौं भन्नु भएको छ।’
तपाईंलाई पार्टीले कारबाही गरे के गर्नुहुन्छ? भन्ने प्रश्नमा उनले भने, 'पार्टीबाट राजीनामा दिएर स्वतन्त्र रूपमा उम्मेदवारी दिएको व्यक्तिलाई कसले कारबाही गर्ने हो र?'
पार्टीबाट उम्मेदवारलाई केही निर्देशन आउन सक्ने भए पनि त्यसले आफूलाई कुनै असर र प्रभाव नपार्ने उनले दाबी गरे।
‘म ब्याक हुँदिनँ मेरो उम्मेदवारी कुनै पनि हालतमा फिर्ता हुँदैन,’ उनले भने, ‘यहाँका जनताको आग्रहमा म उम्मेदवार बनेको हुँ भने मैले उम्मेदवारी फिर्ता लिने कुरै हुँदैन।’
चौधरीले भने कम्युनिस्ट पार्टीमा जोसुकै भए पनि अनुशासनमा बस्नुपर्ने हुँदा स्वतन्त्र उम्मेदवारी दिएका केसीले आफ्नो उम्मेदवारी फिर्ता लिने आशा व्यक्त गरे।
‘लोकतन्त्रको उपयोग गर्दै उहाँले उम्मेदवारी दिनुभयो होला,’ चौधरीले भने, ‘तर, यहाँ पार्टी छ उहाँले पार्टीको अनुशासन मान्नुपर्ने होला र उहाँले उम्मेदवारी झिक्नु हुनेछ भन्ने मलाई विश्वास छ।’
केसीले आफूले टिकट नपाएपछि रोल्पाका केसीले पार्टीका उम्मेदवार चौधरीविरूद्ध बागी उम्मेदवारी दिएका थिए। यद्यपि माघ ९ गतेसम्म उम्मेदवारले आफ्नो उम्मेदवारी फिर्ता लिन पाउने समय सीमा कायमै छ।
रोल्पाका केसी २०७९ सालको निर्वाचमा नेकपा (माओवादी केन्द्र) बाट निर्वाचित भएका थिए। नेकपा कालमा सुरूमा अर्थमन्त्री बनेका उनी पहिलो मुख्यमन्त्री शंकर पोखरेल पछि लुम्बिनीको मुख्यमन्त्री बनेका थिए।
केसीकै पालामा बुटवलबाट दाङको क्षेत्र नम्बर १ अन्तर्गत पर्ने राप्ती गाउँपालिकामा राजधानी सारिएको थियो। बुटवलबासीले रातारात राजधानी सारिएको भन्दै उनको व्यापक आलोचना गरेका थिए। त्यसको बुटवलबासीले चर्को विरोध गरेका थिए।
मेटमणिले २०७९ सालको संसदीय निर्वाचन जितेका थिए। जतिखेर नेपाली कांग्रेस–नेकपा (माओवादी केन्द्र) सहितको गठबन्धनका थियो। त्योभन्दा पहिले पनि मेटमणिले नेकपाको वामगठबन्धन कालका दाङको क्षेत्र नं. १ बाटै निर्वाचन जितेका थिए।
क्षेत्र नम्बर १ मा नेपाली कांग्रेसका सहमहामन्त्री योगेन्द्र चौधरी, नेकपा मेटमणि चौधरी, नेकपा (एमाले) का पूर्वप्रदेश सभा सदस्य रेवतीरमण शर्मा, राष्ट्रिय स्वतन्त्र पार्टीका देवराज पाठकसहित १२ राजनीतिक दलका उम्मेदवारले मंगलबार मनोनयनपत्र दर्ता गराएका छन्। यहाँ ६९ वर्षीय मालिकराम यादवले पनि स्वतन्त्र उम्मेदवारी दिएका छन्।
-1746009348.jpg)
