नेपाली कांग्रेसले वैशाखभर क्रियाशील सदस्यता नवीकरण र वितरण गर्ने भएको छ।
नेताहरूका अनुसार क्रियाशील सदस्य लिन चाहने व्यक्ति अनिवार्य रूपमा सम्बन्धित वडा कार्यसमितिमा पुग्नैपर्ने व्यवस्था गरिएको छ।
पहिलेजस्तो अरूले फारम भरिदिएर र शुल्क तिरिदिएर अब क्रियाशील सदस्यता नपाइने भएको हो।
महामन्त्री प्रदीप पौडेलका अनुसार सम्बन्धित व्यक्ति आफै वडा कार्यसमितिमा पुगेर क्रियाशील फारम भर्नुपर्छ।
'क्रियाशील सदस्य लिन चाहने व्यक्ति आफै आफ्नो वडा कार्यसमितिमा पुगेर फोटो खिचाउनुपर्छ, मोबाइल नम्बर अनिवार्य दिनुपर्छ किनकि त्यसमा ओटिपी आउँछ, त्यही पासवर्डका आधारमा क्रियाशील सदस्यता भेरिफाइ गरिन्छ,' महामन्त्री पौडेलले भने, 'परम्परागत क्रियाशील सदस्यता कार्डको सट्टामा अब हामी कांग्रेस आइडी दिन्छौं, यो डिजिटल हुन्छ।'
कांग्रेसले पार्टीको विद्यमान क्रियाशील सदस्यता वितरण, व्यवस्थापन र अभिलेखिकरण प्रणालीलाई व्यवस्थित, चुस्त र सहज बनाउन खोजेको छ।
हालसम्म पार्टीमा आबद्ध रहेकाहरूलाई क्रियाशील सदस्यता अभिलेखमा राखी एक पटकका लागि सम्पूर्ण सदस्यलाई पुनः क्रियाशील सदस्यता फाराम भर्न समय दिने तयारीमा कांग्रेस छ। त्यसका लागि वैशाखभर क्रियाशील सदस्यता नवीकरण र वितरण अभियान चल्नेछ।
कांग्रेसले वैशाखभिर देशका ६ हजार ७ सय ४३ वटै वडामा सदस्यता अद्यावधिक विशेष अभियान सञ्चालन गर्ने केन्द्रीय समितिबाट निर्णय गरिसकेको छ।
'वैशाखमा सदस्यता अद्यावधिक गरेका सदस्यका लागि पार्टीले नयाँ नम्बरसहित कांग्रेस आइडी दिनेछ,' महामन्त्री पौडेलले भने, 'वैशाखमा अद्यावधिक गरेकाहरूको नामावली मात्रै अब क्रियाशील सदस्यताका रूपमा कायम रहन्छ।'
२०७८ मंसिरमा १४ औं महाधिवेशन हुँदा कांग्रेसमा ८ लाख ८२ हजार ८ सय १६ जना क्रियाशील सदस्य कायम थिए। विधानअनुसार प्रत्येक वर्ष क्रियाशील सदस्यता नवीकरण गर्नुपर्छ तर अधिकांश क्रियाशील सदस्यले महाधिवेशन तोकिएपछि मात्रै क्रियाशील सदस्यता नवीकरण गर्ने गरेका थिए।
पार्टीका क्रियाशील सदस्यहरू अर्कै पार्टीका उम्मेदवारका पक्षमा खुल्ने, भोट माग्ने र हाल्ने गरेपछि कांग्रेसले थोरै तर संगठनप्रति प्रतिबद्ध क्रियाशील सदस्य मात्रै कायम राख्न खोजेको नेताहरूले बताएका छन्।
यो वर्ष २०८२ मा क्रियाशील सदस्यता नवीकरण गरेकाहरू पनि वैशाखमा सम्बन्धित वडा पुगेर क्रियाशील सदस्य फारम भर्नुपर्ने कांग्रेसले जनाएको छ।
'म काठमाडौंको वडा नम्बर ३० बाट क्रियाशील सदस्य छु। अस्ती भर्खर मैले शुल्क तिरेर क्रियाशील नवीकरण गरेको थिएँ। तर वैशाख १ गते फेरि म वडा कार्यसमितिमा पुगेर क्रियाशील फारम भर्नुपर्छ, फोटोसहित आवश्यक विवरण दिन्छु। वडा कार्यसमितिले निर्णय गर्छ अनि मैले कांग्रेस आइडी पाउँछु,' सभापति गगन थापाले भने, 'कांग्रेस आइडी डिजिटल हुन्छ, एकपटक लिएपछि फेरि फारम भरिराख्न पर्दैन।'
कांग्रेस क्रियाशील सदस्यता नवीकरण गर्न रु. २ सय शुल्क तिर्नुपर्छ। हालसालै नवीकरण शुल्क तिरेकाहरूले फेरि शुल्क तिर्न पर्दैन।
'उदाहरणका लागि- काठमाडौंको वडा नम्बर ३० मा ३४३ जना क्रियाशील सदस्य छन्। वैशाखभर कति अद्यावधिक गराउन आउँछन्, कति नयाँ आउँछन् उनीहरूले कांग्रेस आइडी पाउँछन्,' सभापति थापाले भने, 'जो अध्यावधिक गर्न आफै पुग्छन् उनीहरू कांग्रेस क्रियाशील सदस्य रहन्छन्, अद्यावधिक नगर्नेको नाम अभिलेखमा रहन्छ, उनीहरूले १५ औं महाधिवेशनमा भाग लिन पाउँदैनन्।'
कांग्रेसले असोजमा १५ औं महाधिवेशन गर्ने गरी केन्द्रीय समितिबाट कार्यतालिका ल्याएको छ।
साथै अब कांग्रेस क्रियाशील सदस्यहरूले शपथ पनि लिनुपर्ने भएको छ।
कांग्रेस आइडी लिएलगत्तै वडामै शपथ लिने व्यवस्था छ। शपथको व्यहोरामा 'म नेपाली कांग्रेसको सिद्धान्त, आदर्शप्रति प्रतिबद्ध रहेर नेपाली कांग्रेसको अभियानमा इमान्दारीतापूर्वक सहभागी हुनेछु' भन्ने छ। यो कुरा क्रियाशील सदस्यतासम्बन्धी फारमसँगै समावेश गरिएको छ।
पहिले पनि क्रियाशील सदस्यता लिने बेला यस्तै कुरा लेखिएको चार पेजको फारम हुन्थ्यो तर त्यसलाई प्राथमिकतामा राखिएको थिएन। यसपालि क्रियाशील लिन सम्बन्धित व्यक्ति नै वडा कार्यसमितिमा जानुपर्ने भएकोले शपथ लिनुपर्ने कुरालाई प्राथमिकतामा राखिएको नेताहरू बताउँछन्।
क्रियाशील सदस्यहरूलाई पार्टीको सदस्यता लिएको भनेर सार्वजनिक रूपमा स्वीकार गर्न पनि शपथ लिने कुरालाई प्राथमिकताका साथ राखिएको छ।
'अब वैशाखभर क्रियाशील सदस्यता अभियानका क्रममा जतिले अद्यावधिक गर्दैनन् तिनको सदस्यता खारेज भयो भने हुन्छ, ती अभिलेखमा रहन्छन् तर १५ औं महाधिवेशनमा भाग लिन पाउँदैनन्,' सभापति थापाले भने।
यो कुरा सभापति थापाले नेता, कार्यकर्ताहरू सहभागी रहने प्रदेशस्तरीय निर्वाचन समीक्षामा पनि राख्ने गरेका छन्।
-1765118046.JPG)
-1746009348.jpg)
