राष्ट्रिय स्वतन्त्र पार्टी (रास्वपा) का सांसदहरूले प्रधानमन्त्री बालेन शाहकै अगाडि गृहमन्त्री सुधन गुरूङको आलोचना गरेका छन्।
प्रधानमन्त्री शाहले सोमबार सिंहदरबारमा बागमती प्रदेशका सांसदहरूसँग छलफल गरेका थिए।
छलफलमा काभ्रेपलाञ्चोक–१ का सांसद मधु चौलागाईं र धादिङ–१ की सांसद आशिका तामाङले गृहमन्त्री गुरूङको कार्यशैलीको आलोचना गरेका हुन्।
गृहमन्त्री गुरूङ केही समयअघि काभ्रेको रोशी खोला किनार क्षेत्र अवलोकन गर्न गएका थिए। त्यस बेला आफूसँग समन्वय नगरिएको भन्दै सांसद चौलागाईंले प्रश्न उठाएका हुन्।
'गृहमन्त्रीलाई रोशी खोलाका भित्री भागहरूबारे थाहा छैन। त्यहाँ जाँदा निर्वाचित जनप्रतिनिधिसँग समन्वय गर्नुपर्थ्यो भन्ने कुरा मैले आज प्रधानमन्त्रीज्यूलाई राखेको हुँ,' उनले सेतोपाटीसँग भने।
निर्वाचन क्षेत्रमा मन्त्रीहरू जाने बेला जनप्रतिनिधिसँग समन्वय गर्ने निर्देशन दिन आफूले प्रधानमन्त्री शाहसँग माग गरेको पनि चौलागाईंले बताए।
त्यो बेला रोशी खोला क्षेत्रमा गृहमन्त्री गुरूङको विरोधमा प्रदर्शन हुन लागेको भए पनि आफ्ना कारणले रोकिएको उनले बताए।
'त्यहाँ गृहमन्त्रीलाई कालो झण्डा देखाउन खोजिएको थियो। गृहमन्त्रीले समन्वय नगरे पनि हामीले आग्रह गरेका कारण दुर्घटना हुने स्थिति भएन', चौलागाईंले भने, 'मैले यो विषय यसअघि संसदीय दलको बैठकमा पनि उठाएको थिएँ।'
त्यस्तै, सांसद आशिका तामाङले पनि गृहमन्त्री गुरूङले धादिङ गएर निर्देशन दिएको विषयमा प्रश्न उठाएकी छन्।
तामाङले नागढुंगा मुग्लिन सडक निर्माण आयोजनाका लागि बालुवाको समस्या समाधान गर्ने क्रममा गृहमन्त्री धादिङ जाँदा समन्वय नभएको बताएकी हुन्।
'लामाचौर भन्ने स्थानबाट स्थानीय सरकारले दुई टिपर बालुवा निकाल्दा एक टिपर अर्कै ठाउँमा लैजाने गरेको गुनासो आएपछि स्थानीयले रोक लगाएका थिए,' आशिकाले भनिन्, 'हामीले बालुवा निकाल्न दिने तर पारदर्शी हुनुपर्छ भनेका थियौं। तर गृहमन्त्रीलाई आयोजनाका मानिस लिएर गए। निर्वाचन सांसदसँग समन्वय भएन।'
उनले एउटै पार्टीको गृहमन्त्री र सांसद हुँदा समेत समन्वय नगरिएको बताइन्।
'गृहमन्त्री आएपछि गजुरीबाट नै यो क्षेत्रको खोइ भनेर मलाई धेरै फोन आयो,' आशिकाले भनिन्, 'जबकी गृहमन्त्रीले त मलाई फोन गरेर तपाईंको क्षेत्रको यस्तो गुनासो छ। के हो कुरा भनेर सोधेको भए हुन्थ्यो।'
सांसद तामाङले गल्ती ढाकछोप गर्दा भविष्यमा पार्टीलाई नै समस्या पर्न सक्ने भएकाले आफूले विषय प्रधानमन्त्रीसँग राखेको बताइन्।
'गृहमन्त्री हाम्रै पार्टीबाट हुनुहुन्छ,' तामाङले भनिन्, 'सूचना नदिई जानुभयो। जबकी पार्टीले समन्वयन गर्नू भनेर निर्देशन दिएको छ। समन्वय भएन भने त भोलि बजेट पारित गर्नेदेखि धेरै कुरामा सांसदको भूमिकामा समस्या पर्छ।'
कानुन व्यवसायी समेत रहेका काभ्रेका सांसद चौलागाईंले भारतमा तत्कालीन प्रधानमन्त्री राजीव गान्धीको हत्या हुँदा सम्बन्धित क्षेत्रको सांसदमाथि प्रश्न उठेको उदाहरण पनि दिए।
'राजीव गान्धीको हत्या हुँदा सम्बन्धित क्षेत्रका सांसदलाई आफ्नो क्षेत्रमा के भइरहेको छ भन्ने थाहा नपाएको भनेर प्रश्न उठ्यो', चौलागाईंले भने, 'सम्बन्धित क्षेत्रका सांसदलाई जानकारी दिएर गृहमन्त्री काभ्रे जानुपर्थ्यो। काभ्रेको क्षेत्र नम्बर–१ गुण्डागर्दीको अखाडा हो। प्रहरीले मात्र सुरक्षा गर्ने अवस्था नबन्न सक्छ। जानकारी गराएर जाँदा राम्रो हुन्थ्यो।'
सांसदहरुले उठाएको प्रश्नमा प्रधानमन्त्री बालेन शाहले प्रतिक्रिया दिएका थिएनन्।
'प्रधानमन्त्रीले कुनै प्रतिक्रिया दिनुभएन। सबै कुरा सम्झन सकिन्नँ, लेखेर दिनुहोस् भन्नुभयो', प्रधानमन्त्री शाहका भनाइ उद्धृत गर्दै सांसद चौलागाईंले भने, 'हामी सकेको गर्छौं भन्नुभयो।'
-1746009348.jpg)
