नेकपा एमाले युवा विद्यार्थी विशेष जिल्ला कमिटीमा सांस्कृतिक तथा नैतिक विचलनको आरोप लागेका नेताहरूलाई तुरून्त कारबाहीको दायरामा ल्याउनुपर्ने माग भएको छ।
गत चैत २१ गते बसेको जिल्ला कमिटीको चुनावी समीक्षा बैठकमा पार्टीका नेताहरूमाथि बलत्कार, भ्रूण हत्या, जबर्जस्ती करणीजस्ता जघन्य अपराधको आरोप लागिरहेको तर पार्टीले यसबारे धारणा सार्वजनिक नगरेको भन्दै प्रश्न उठाइएको हो।
बलात्कार अभियोगमा कर्ण मल्ल पक्राउ परेका छन्।
पार्टी सचिव महेश बस्नेत, सांसद ऐन महर लगायतमाथि पनि यस्तो आरोप सार्वजनिक रूपमै लागिरहेको भन्दै यसबारे पार्टीले सत्यतथ्य बाहिर ल्याउनुपर्ने आवाज उठेको एक नेताले बताए।
‘पार्टी नेताहरूमा देखिएको गम्भीर सांस्कृतिक तथा नैतिक विचलनमा पर्नेहरूलाई कारबाहीको दायरामा ल्याउनुपर्छ भन्ने आवाज उठेको छ,’ एक नेताले सेतोपाटीसँग भने, ‘पार्टीको केन्द्रीय नेताहरूमाथि केही अमुक महिलाहरूले लामो समयदेखि लगातार बलात्कार, भ्रुण हत्या, जबर्जस्ती करणी आदिको आरोप लगाउँदा समेत पार्टीको अनुशासन आयोग तथा पार्टी मौन बसेको हुँदा पार्टीले तत्काल सो विषयमा सम्बोधन गर्नुपर्ने कुरा गरिएको छ।’
जिल्ला कमिटीका एक नेताका अनुसार बैठकमा सदस्यहरूले राखेका धारणा, उठाएका प्रश्न आदि समेटेर प्रतिवेदन तयार पारी माथिल्लो कमिटीमा पठाइएको छ।
जिल्ला कमिटी उपाध्यक्ष श्यामकाजी खत्री, प्रचार विभाग प्रमुख किरण देउजा, कानून तथा सामाजिक सेवा विभाग प्रमुख शोभा सापकोटाले प्रतिवेदन तयार पारी इन्चार्जमार्फत् माथिल्लो कमिटीमा बुझाएका छन्।
बैठकमा बोल्ने क्रममा अहिलेको पार्टी नेतृत्वले भदौ २३ र २४ गतेको घटनाको यर्थाथपरक विश्लेष्ण गरी माफी माग्नुपर्ने, आत्मालोचना गर्नुपर्ने धारणा राखेको प्रतिवेदनमा उल्लेख छ।
जिल्ला कमिटी सदस्यहरूले यही नेतृत्वबाट पार्टी अघि बढ्न नसक्ने पनि विचार राखेका छन्।
‘एमालेको जनतासँग बढेको दूरी कम गर्न नयाँ योजनाको साथ लाग्नुपर्ने आवश्यकता देखिएको छ। पार्टीले पछिल्लो समय पटक–पटक सरकारको नेतृत्व गर्दा गरेको राम्रो कामको व्यापक प्रचार गर्नुपर्ने देखिन्छ। नेताहरूले कार्यकर्ता सबैलाई दास सम्झने कार्यशैली कायम रहने हो भने हामीलाई जनमोर्चा या राप्रपा हुन कसैले रोक्न सक्दैन,’ सदस्यहरूले राखेको धारण उद्धृत गर्दै प्रतिवेदनमा उल्लेख गरिएको छ।
नेताले समाजिक सञ्जालमा पोस्ट गरेको स्ट्याटस या विचारमा लाइक, प्रतिक्रिया (कमेन्ट) नगरेकै आधारमा विभेद गर्न थालिएको भन्दै यो अत्यन्तै दुर्भाग्यपूर्ण भएको बताइएको छ।
‘जसले गर्दा नेता र कार्यकर्ताको स्पष्ट दूरी बढ्छ। कार्यकर्ताहरूलाई जिम्मेवारी दिँदा योग्यता र क्षमताको आधारमा दिनुपर्छ। पार्टीका नेता तथा कार्यकर्ताहरूमा अनुशासनमा कमी आएको हुँदा गल्ती गर्नेलाई कारबाही र राम्रो काम गर्नेलाई पुरस्कारको व्यवस्था गर्नुपर्छ,’ प्रतिवेदनमा उल्लेख छ।
पार्टीको ११ औं महाधिवेशनमा प्रतिनिधि छनौट केबल नेताको व्यक्तिगत इच्छामा निश्चित व्यक्तिहरू तोकेर, लोकतान्त्रिक अभ्यास समेत हुन नदिइ मध्यरातमा खल्तीबाट सूची निकालेको र प्रतिनिधिको रुपमा सार्वजनिक गरेको भन्दै असन्तुष्टि राखिएको छ।
‘अब यस्ता खाले कार्य बन्द गर्नुपर्छ। कार्यकर्ताहरूमा इमान्दारीपूर्वक पार्टी संगठनको काम गरेर मात्र नहुने रहेछ, कुनै अमुक नेताको विश्वास नजिती संगठनको जिम्मेवारी र प्रतिनिधि हुन सकिँदैन भन्ने मानक स्थापित हुनु इमान्दार कार्यकर्ताको लागि दुःखद विषय हो,’ प्रतिवेदनमा उल्लेख छ।
आलोचनात्मक चेत सहित पार्टी सुधारको पक्षमा निरन्तर लागिरहेका अनेरास्ववियुका तथा युवा संघका पूर्व नेताहरूलाई पार्टीमा क्षमता अनुसारको उचित भूमिका सहितको जिम्मेवारी दिन उनीहरूले माग गरेका छन्।
‘अहिलेको सन्दर्भमा आन्दोलनमा सिंगो पार्टी पंक्ति होमिनुपर्ने तर आन्दोलनको आयोजक चाहिँ भ्रातृ संगठन हुनुपर्ने अवस्था छ। आफू नेता बन्न र माथिल्लो कमिटीमा प्रतिनिधित्व गर्नको लागि थोकमा पार्टी सदस्यहरू बनाउने प्रचलनको अन्त्य गर्नुपर्छ। पार्टी केन्द्रले समसामयिक र राजनीतिक विश्लेण गर्न सकेको पनि देखिँदैन। पार्टीको संगठनात्मक ढाँचा पिरामिड शैलीको हुनुपर्नेमा सोली आकार भएको हुँदा पार्टीलाइ गम्भीर क्षति पुगेको छ। यसलाई सुधार गर्नुपर्छ,’ प्रतिवेदनमा भनिएको छ।
-1746009348.jpg)
