नेकपा एमालेका नेता प्रदीप ज्ञवालीले मिडियातिर वामपन्थी एकताको चर्चा भएको भन्दै टिप्पणी गरेका छन्।
शुक्रबार सामाजिक सञ्जाल फेसबुकमा टिप्पणी लेख्दै नेता ज्ञवालीले संस्थागत निर्णय भएको थाहा नभएको तर मिडियातिर ‘वामपन्थी एकता’ को चर्चा सुरू भएको बताएका हुन्।
‘पहिलो त, आजको चुनौती वामपन्थी या कम्युनिस्ट आन्दोलनको दायरामा मात्र सीमित छैन। नेपालले लामो प्रयत्न पश्चात् आर्जेको प्रगतिशील लोकतान्त्रिक स्पेस नै साँघुरिँदै गएर सर्वसत्तावादी शासकीय शैलीतिर उन्मुख हुँदै गरेको, सामाजिक सुरक्षा र न्यायसहितको लोककल्याणकारी आर्थिक प्रणाली होइन, नवउदारवादी बजार स्वच्छन्दतातिर आर्थिक दिशा सोझिँदै गरेको र स्थापित विधि, कानुनी प्रणाली र लोकतान्त्रिक संस्थाहरूको ठाउँमा ‘तिलस्मी नायक’ हरूले जादुमयी ढंगले सुनौला दिन ल्याइदिने विभ्रमले समाजको ठूलै हिस्सा प्रभावित भएको समयमा हामी छौं,’ सामाजिक सञ्जाल फेसबुकमा उनले भनेका छन्, ‘त्यसैले संकटलाई फराकिलो क्यानभासमा राखेर हेरिनु पर्छ र तदनुरूपकै नीति अवलम्बन गरिनु पर्छ।’
यतिबेला वामपन्थीहरू सहित सबै पार्टीहरू समीक्षाको प्रक्रियामा रहेको उनले बताएका छन्। धक्का एमालेले पनि खाएको छ, दर्जन बढी समूह ‘एकीकृत’ गरेर बनेको नेकपाले पनि खाएको सन्दर्भ पनि उल्लेख गरेका छन्।
‘विद्रोह गरेर बनेका संयुक्त या प्रलोपाहरूले पनि धक्का खाएका छन्। समस्या एउटै छैन र समाधानको रेसिपी पनि एउटै हुन सक्दैन,’ उनले भनेका छन्, ‘यस्तो अवस्थामा पहिलो कदम भनेकै सङ्कटको गम्भीर्यबोध, निर्मम आत्मसमीक्षा र व्यापक सुधार/पुनर्गठनको विधिवत् प्रक्रिया अगाडि बढाउनु हो। पहिले आफू तङ्ग्रिएपछि मात्रै सार्थक विमर्श र विषयगत सहकार्यको अर्थ हुन सक्छ।’
अन्यथा यस्ता छलफल या त बौद्धिक विलासितामा सीमित हुने या आफ्नो घरभित्रका समस्या छिमेकतिर सारिदिने दाउपेचमा रूपान्तरित हुन जाने उनको ठहर छ।
अहिलेको खाँचो आफैभित्र नियाल्ने, मन्थन गर्ने र सुधार गर्ने भएको पनि उनको बुझाइ देखिन्छ।
-1756794700.JPG)
-1746009348.jpg)
