सत्तारूढ राष्ट्रिय स्वतन्त्र पार्टीका सांसद पुरूषोत्तम यादवले देशका युवा लागुऔषधको दलदलमा डुब्दा पनि सरकार कुम्भकर्ण निन्द्रामा रहेको बताएका छन्।
प्रतिनिधि सभाको आजको शून्य समयमा बोल्दै यादवले भने, ‘देशका युवा लागुऔषधको दलदलीमा डुब्दा पनि सरकार कुम्भकर्ण निन्द्रामा छ। आज सरकारलाई घन्टी बजाएरै जगाउने बेला आएको छ।’
सिराहा जिल्लामा मात्रै पछिल्ला १६ दिनमा लागुऔषधसम्बन्धी ६ वटा मुद्दा दर्ता भएको उनले बताए।
‘पछिल्लो १५ दिनमा सिराहामा मात्रै ६ मुद्दा दर्ता, १२ जना पक्राउ परे, ४१ किलोग्राम गाँजा र १०९ ग्राम खैरो हेरोइन बरामद भएको छ,’ उनले भने, ‘एकै जिल्लाको यो चित्रले देशभर भयावह अवस्था झल्काउँछ।’
उनले राज्य व्यवस्था समितिमा पनि यस विषयमा आफूले कुरा उठाएको बताए। ‘तर सरकारसँग न स्पष्ट कार्ययोजना छ न युवालाई बचाउने दृढ इच्छाशक्ति छ,’ उनले भने।
