राष्ट्रिय प्रजातन्त्र पार्टीका दलका नेता ज्ञानेन्द्र शाहीले कर्णालीमा बस दुर्घटना हुँदा मन्त्रीको सवारीमा हेलिकप्टर उडेको तर उद्धारमा नगएको भन्दै संसदमा आक्रोश व्यक्त गरेका छन्।
असार १८ गते दैलेखस्थित कर्णाली नदीमा गाडी खसेको भएको थियो।
उक्त घटनामा ५ जना बेपत्ता छन्। भिरमा अड्किएको अवस्थामा कालीकोटका पाचल झरना गाउँपालिका–९ का ४५ वर्षीय जेखे तिरूवा मृत अवस्थामा फेला परेका थिए।
प्रहरीले कैलालीमा एक महिला र एक पुरूषको शव फेला पारेको छ। शव सोही दुर्घटनाका बेपत्ताहरूको हुनसक्ने आकलन गरिएको छ। कर्णालीमा हराएको बस अहिलेसम्म भेटिएको छैन।
उक्त घटना भएकै समयमा उर्जा तथा जलस्रोत मन्त्री विराजभक्त श्रेष्ठ जगदुल्ला हाइड्रोपावरको विभिन्न संरचनाको उद्घाटनका लागि कर्णालीको डोल्पा पुगेका थिए। राप्रपा सांसद शाहीले प्रकरणसँग जोडेर संसदमा आक्रोश पोखेका हुन्।
'कर्णालीमा १८ गते गाडी कर्णाली नदीमा खस्यो। नदीको बीचमा मानिसहरू हार गुहार गरिरहेका थिए। एक जना मान्छे भिरमा अड्किएका थिए। जीवनको भिक मागिरहनुभएको थियो। गुहारले नदीको किनार थर्कियो। डाको लगाउँदालगाउँदै स्वर सुक्यो। स्वरसँगै जीवन समाप्त भयो। गाडी डुब्यो। भिर अड्किएको मान्छेको मृत्यु भयो', शाहीले भने, 'त्यही बेला आकाशमा हेलिकप्टर देखियो। तर त्यो उद्धारका लागि थिएन, मन्त्रीको सवारीका लागि थियो। केन्द्रीय मन्त्री हेलिकप्टरमा कर्णालीको आकाश घुमिरहेका थिए।'
उनले प्रदेश सभामा पनि भाग पुगेन भन्दै सांसदहरू एकआपसमा झगडा गरिरहँदा कर्णालीका नागरिक नदीमा डुबेर जीवन बचाइदिनह हार गुहार मागिरहेको उल्लेख गरे।
'उद्धार टोलीसँग साधन थिएन। सुर्खेतबाट दुर्घघटनास्थलमा पुग्न पाँच घण्टा लाग्यो। हेलिकप्टर आकाशमा घुम्दा एउटा हेलिकप्टर पठाउने क्षमता यो सरकारसँग भएन। अनि काम कसका लागि गरिरहेका छौँ। भाषण किन गरिराखेका छौँ', शाहीले भने, '२४ घण्टा बित्यो। हेलिकप्टर गएन। प्रदेश सरकारले पनि २४ घण्टा पछि निर्णय गर्यो। भीरमा अड्किएको मान्छे बचाउन सकेनौँ। सुरक्षाकर्मी पुग्यो। तर मुचुल्का उठाउन पुग्यो।'
शाहीले दुर्घटनामा आफूले पनि आफन्त गुमाएको उल्लेख गरे।
'मैले पनि आफन्त गुमाएको छु। मैले पनि परिवार गुमाएको छु। त्यसैले यो विषयमा बोल्दा मेरो मन टुक्रिन्छ, मेरो आत्मा रुन्छ', शाहीले भने, म दयाको भिख मागिराखेको छैन। सरकारसँग र संसदसँग। म केवल एउटा प्रश्न सोध्न आएको छु। कर्णाली नेपालमा हो कि हैन जवाफ चाहियो। मन्त्री हेलिकप्टरमा सयर गर्दा कर्णालीमा नागरिक ड्बुदा उद्धार गर्न नहुने?'
उनले उद्दारका लागि हेलिकप्टरु सञ्चालन गर्ने भनेर सररकाले ठूला गफ गरेको बताए।
'सरकारले यही संसदमा विपद् व्यवस्थापनका लागि हेलिकप्टर सञ्चालन गर्ने, उद्धारलाई प्राथमिकता दिने भनेर ठूला-ठूला गफ हान्यो', शाहीले भने, 'आकासमा मन्त्रीको हेलिकप्टर उडिरहँदा नदीमा नागरिकहरू डुबिरहेका थिए।'
