प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले भ्रष्टाचार नियन्त्रणका लागि सम्पत्ति छानबिनको सुरूआत प्रधानमन्त्री बालेन शाह र आफूबाट गर्न चुनौती दिएका छन्।
सोमबार प्रतिनिधिसभा बैठकमा सरकारको १०० दिनको कार्यकाल समीक्षा गर्दै आङ्देम्बेले भने, 'हाम्रो मूल चासो भ्रष्टाचार नियन्त्रणमा हो। सम्माननीय प्रधानमन्त्रीज्यूको म सम्मानपूर्वक नामै लिन्छु र भन्छु सम्पत्ति छानबिनको सुरूआत म विपक्षी नेता भीष्मराज आङ्देम्बे र प्रधानमन्त्री बालेन्द्र शाहबाट होस्।'
उनले अगाडि भने, 'पाँचथरको उम्लाबुङ (नवमीडाँडा) स्थित तीनघरे, सिलौटी र फुङ्सिङको पाखोबारीको छानबिन होस्। प्रधानमन्त्रीजीको झन्डै २०० तोला सुनको पनि छानबिन होस्।'
प्रधानमन्त्री बालेनले दायाँबायाँ गरेर सुन आर्जन गरे भन्ने आफूलाई पटक्कै विश्वास नभएको उल्लेख गर्दै उनले भने, 'तर तपाईंलाई मत दिएका मतदाताहरूले परबाट सोधिरहेका छन्- आम्मामा... त्यत्रो धेरै सुनको स्रोत के होला? कहाँबाट आयो होला? त्यसैले प्रधानमन्त्रीजी छानबिन गरौं।'
पूर्वप्रधानमन्त्रीदेखि अरू पूर्वउच्च पदस्थ राजनीतिक र कर्मचारीहरूको पनि सम्पत्ति छानबिन गर्न जोड दिँदै उनले त्यसको सुरूआत अरूबाट होइन, प्रधानमन्त्री र आफूबाटै गर्न माग गरे।
'प्रधानमन्त्रीजी तयार हो तपाईं? म तयार छु। छानबिन आफैमाथि चाहिँ नगर्ने, अरूमाथि मात्रै गर्ने भन्ने हुँदैन,' आङ्देम्बेले भने।
सम्पत्ति छानबिन गर्दा चयनात्मक सिद्धान्त प्रयोग नहोस् र भ्रष्टाचारविरूद्ध सम्पत्ति छानबिन अभियान विश्वासिलो होस् भन्ने अपेक्षा पनि उनले व्यक्त गरेका छन्।
'त्यो विश्वास तब मात्रै हुन्छ, जब प्रधानमन्त्रीजी आफू पनि निष्पक्ष छानबिनका लागि तयार हुन्छन् र आफ्ना मानिसमाथि छानबिनमा त्यत्तिकै कठोरता देखाउँछन्, जति विपक्षीमाथि देखाउँछन्,' उनले भने, 'सम्पत्ति छानबिनका लागि आवश्यक कानुन चाहिन्छ। जुन सत्तारूढ दल रास्वपाको बाचापत्रको १०० सूचीमा थियो। त्यही बाचा भुल्दै सम्पत्ति छानबिनसम्बन्धी कानुन नबनाई छानबिन गर्दा कानुनी वैद्यतामा प्रश्न उठ्छ।'
