राष्ट्रिय स्वतन्त्र पार्टीले सांसदहरूको अभिव्यक्ति स्वतन्त्रतामा हस्तक्षेप गर्दै 'सेन्सरसिप' लगाएको छ।
सांसदहरूले संसदमा उठाउने विषय समेत एक दिनअघि नै सचेतकद्वय क्रान्तिशिखा धिताल वा प्रकाशचन्द्र परियारलाई पठाउन निर्देशन जारी गरिएको हो। धिताल र परियार रास्वपाका सचेतक हुन्।
सांसदहरूलाई रास्वपा सचेतक क्रान्तिशिखा धितालले पठाएको सन्देशमा भनिएको छ- 'अबदेखि शून्य समय तथा विशेष समयमा प्रस्तुत गर्ने आफ्नो सामग्री (Speech/Notes) अनिवार्य रूपमा मलाई (क्रान्तिशिखा) तथा सचेतक प्रकाशचन्द्र परियारज्यूलाई एक दिन अगाडि नै पठाइदिनुहुन अनुरोध गर्दछु।'
जबकी संविधानले नै सांसदहरूका लागि विशेष प्रकृतिको अभिव्यक्ति स्वतन्त्रताको व्यवस्था गरेको छ।
संविधानको धारा १०३ मा 'संविधानको अधीनमा रही संघीय संसदको दुवै सदनमा पूर्ण वाक स्वतन्त्रता रहने' भनेको छ।
साथै सदनमा व्यक्त गरेको धारणाकै आधारमा पक्राउ गर्न, थुनामा राख्न तथा अदालतमा कारबाही चलाउन बन्देज गरिएको छ।
जसलाई सांसदको विशेषाधिकारमा रूपमा चिनिन्छ।
त्यति मात्र होइन, सांसदले बोलेको कुरा गलत वा भ्रामक अर्थ लगाई प्रकाशन वा प्रसारण गर्न समेत संविधानले बन्देज गरेको छ।
तर रास्वपाकी सचेतक समेत रहेकी धितालले सन्देश पठाउँदै अघिल्लो दिन नै आफूलाई बोल्ने भाषणको टिपोट पठाउन भनेकी हुन्। कुनै पनि विषयमा अभिव्यक्ति दिनुपूर्व अनिवार्य जाँचपास गर्नुपर्ने व्यवस्थालाई 'सेन्सरसिप' भनिन्छ।
रास्वपा सांसदहरूले सरकारको काम कारबाहीमाथि बैठकमै प्रश्न उठाउन थाले लगत्तै सचेतक धितालले सन्देश जारी गरेकी हुन्।
सोमबार रास्वपाका सांसद जगदिश खरेल (दोलखा) ले संसदप्रति सरकार जबाफदेही नभएको टिप्पणी गरेका थिए। साथै उनले सरकारले संसदको गरिमा जोगाए मात्र पाँच वर्ष चल्न सक्ने टिप्पणी गरेका थिए।
'प्रधानमन्त्रीको मात्रै गरिमा बेचेर यो सरकार रहने वाला छैन। हाम्रो पनि गरिमा बच्नुपर्छ,' खरेलले भनेका थिए, 'हाम्रो भूमिका यहाँ आएर ढ्यापढ्याप गर्ने मात्र हो? यत्तिमा सन्तुष्ट हुनेवाला छैन।'
उनले पूर्वाधार विकास मन्त्री सुनिल लम्सालले मन्त्रालयमा नातावाद चलाएको आरोप समेत लगाएका थिए।
त्यस्तै रास्वपाका झापा ३ का सांसद प्रकाश पाठकले पनि चुनाव जितेपछि सरकारले जनतालाई बिर्सिएको टिप्पणी गरेका थिए।
बिजुलीको आपूर्तिबारे प्रश्न उठाउँदै उनले 'रकम तिरेर पनि भरपर्दो सेवा प्राप्त गर्न नसके जतिसुकै बखान गरे पनि सरकारप्रति नागरिकको विश्वसनीयता कमजोर बन्ने' टिप्पणी गरेका थिए।
सांसदहरूले सरकारमाथि प्रश्न उठाउन थालेको पृष्ठभूमिमा धितालले सांसदहरूलाई अघिल्लो दिन नै अनिवार्य भाषण देखाउन 'अनुरोध' शब्द प्रयोग गर्दै निर्देशन दिएकी हुन्।
साथै सांसदहरूलाई उनले सांस्कृतिक पोशाक अथवा कोट नलगाए बैठकमा प्रवेश नै नदिने चेतावनी समेत दिएकी छन्।
'प्रतिनिधिसभामा उपस्थित हुँदा सांस्कृतिक पोशाक बाहेक अन्य पोशाक लगाउने माननीय सदस्यज्यूहरूले अनिवार्य रूपमा कोट लगाई उपस्थित हुनुपर्नेछ,' धितालले पठाएको म्यासेजमा भनिएको छ, 'कोट र लोगो नलगाएको अवस्थामा सदनमा प्रवेश वा उपस्थित हुन नदिइने व्यवस्था रहेको व्यहोरा समेत जानकारी गराइन्छ।'
-1783423496.jpg)
