नेकपा एमालेकी संसदीय दलकी उपनेता पद्मा अर्यालले निर्वाचन आयोग जस्ता संवैधानिक निकायमा नियुक्तिका लागि खुला प्रतिष्पर्धाको व्यवस्था गर्नुपर्ने बताएकी छन्।
प्रमुख निर्वाचन आयुक्त र आयुक्तहरूको सुनुवाइ सम्बन्धी छलफल गर्न बिहीबार बसेको संसदीय सुनुवाइ समितिको बैठकमा उनले यस्तो बताएकी हुन्।
निर्वाचन आयोग तटस्थ भएर काम गर्ने राजनीतिक प्रकृतिको संस्था भएकाले नियुक्ति प्रक्रियालाई अझ पारदर्शी र प्रतिस्पर्धात्मक बनाउनुपर्ने उनको भनाइ छ।
उनले वर्तमान सरकारले पनि पुरानै अभ्यासलाई निरन्तरता दिएको उल्लेख गरिन्।
उनले सुनुवाइ प्रक्रियालाई हतार नगरी सबै पक्षसँग पर्याप्त छलफल गरेर सहमतिमा नै गर्नुपर्नेमा जोड दिइन्।
उनले भनिन्, ‘अहिले जुन खालको वातावरण छ, यसले खुला प्रतिष्पर्धा राम्रो हो। यो निर्वाचन आयोग हेर्दा तटस्थ, काम गर्ने राजनीतिक हो, यो सबै राजनीतिक काम गर्ने संस्था हो। त्यसैले यस्ता संस्थामा एकदम खुला प्रतिष्पर्धाको व्यवस्था गर्न पाएको भए धेरै राम्रो हुन्थ्यो, हामीले पुरानै अभ्यासलाई समातेर अगाडि बढिरहेका छौं। यसो भइरहँदा पनि राम्रो कसरी गर्न सकिन्छ भन्ने विषयमा ध्यान दिने हो। यसमा केही हतारो छैन, त्यसैले हतार नगरी यस्ता विषयहरूलाई अलि मिलाएरै नै छलफल गरौँ। हाम्रा छलफलले राम्रो गराउन सक्ने जति ठाउँमा गराउने हो। अब यहाँ आएकालाई पठाउन धेरै दु:ख त गर्नुपर्दैन, यो औपचारिकता मात्रै हो।’
उनले अगाडि भनिन्, ‘अब औपचारिकता मात्रै नबनाउने हो, साँच्चै राम्रो बनाउने हो भने अलि फराकिलो ढंगले छलफल गरौँ। त्यो खालको वातावरण बनाएर योग्य भन्दा योग्य व्यक्ति आओस् भन्ने नै हो, अरू इन्ट्रेस्ट के हो र? तपाईं हामी जाने होइन, केही होइन। त्यो विषयमा अलि खुला छलफल गर्ने वातावरण बनाऔं, आएकालाई पठाउन त धेरै मेहनत गरिरहनु पर्छ जस्तो मलाई लाग्दैन।’
उनले संवैधानिक परिषद्ले सिफारिस गरेका व्यक्तिलाई समितिले औपचारिक रूपमा अनुमोदन गर्ने मात्रै काम गर्न नहुने बताइन्। –न्युज एजेन्सी नेपाल
