इरानसँगको दुस्मनी पुनः सुरू भएको कारण सुरक्षा सतर्कता अपनाउँदै अमेरिकी राष्ट्रपति डोनाल्ड ट्रम्पले कतारले उपहार दिएको बोइङ ७४७-८ को सट्टा पुरानो 'एयर फोर्स वान' विमान प्रयोग गरेका छन्।
ट्रम्पको सुरक्षाको जिम्मा लिएको सिक्रेट सर्भिसको आग्रहमा टर्कीबाट फर्किने क्रममा यसो गरिएको भनेर त्यसबारे जानकार अधिकारीहरूको हवाला दिंदै द न्यूयोर्क टाइम्सले जनाएको छ।
यो अदलाबदलीले राष्ट्रपतिले जतिसक्दो चाँडो तयार पार्न दबाब दिएको नयाँ विमानमा पर्याप्त सुरक्षा उपकरण थपिएका थिए कि थिएनन् भन्ने प्रश्न अझ बढाएको छ।
तीव्र गतिमा काम फत्ते गर्ने समय तालिकाका कारण यसमा उन्नत मिसाइल रक्षा प्रणाली र राष्ट्रपतिको सुरक्षाका लागि प्रयोग हुने अन्य उपकरणहरू थप्न सम्भव भयो कि भएन भन्नेबारे सांसद लगायत केहीले चिन्ता व्यक्त गरेका थिए।
विमानको अदलाबदली पछि ह्वाइट हाउसका सञ्चार निर्देशक स्टिभन च्युङले एक विज्ञप्तिमा निकालेका छन्।
'नयाँ एयर फोर्स वान एक अत्याधुनिक विमान हो जसमा राष्ट्रपतिको र उहाँका कर्मचारीहरूको सुरक्षा सुनिश्चित गर्न उच्च-स्तरीय सुरक्षा प्रोटोकलहरू जडान गरिएको छ,' उनले स्पष्ट पारे।
'राष्ट्रपतिले हालै भनेझैं अमेरिकाका धेरै शत्रुहरू छन् जसको नजर उनीमाथि छ। ती खतराहरूलाई सम्बोधन गर्न हामी आफूसँग भएका हरेक उपकरणको प्रयोग गर्छौं,' उनले थपे।
तर कतारले ट्रम्पलाई उपहार दिएको नयाँ विमानमा पुरानो विमानको जस्तो सबै सुरक्षा सुविधाहरू नभएको भनेर नयाँ विमानको क्षमताको बारेमा जानकार व्यक्तिहरूले टाइम्सलाई बताएका छन्।
टर्कीबाट प्रस्थान गर्दा राष्ट्रपतिको विमान परिवर्तन गर्नु कुनै निश्चित खतराको कारण नभई सिक्रेट सर्भिसको सल्लाहमा गरिएको एक सतर्कताको उपाय मात्र भएको उनीहरूले जनाएका छन्।
विगतमा कतारी राजपरिवारले प्रयोग गरेको विमानको विलासी सुविधाहरू देखेर दंग परेका ट्रम्पले नेटो शिखर सम्मेलनका लागि टर्की जान सोमबार राति सोही विमानको प्रयोग गरेका थिए। उनी टर्की पुगेपछि इरानसँगको द्वन्द्व फेरि चर्कियो र अमेरिकाले इरानविरुद्ध शृङ्खलाबद्ध आक्रमणहरू गर्यो। त्यसैले इरानले सो नयाँ विमानमा हमला गर्नसक्ने खतराका कारण विमानको अदलाबदली गरिएको हो।
ट्रम्पले भने आफ्नो विमान परिवर्तन सुरक्षा चिन्ताका कारण नगरिएको जनाए। बरु नयाँ जेट चाँडै प्रस्थान गर्न सकोस् र अमेरिकी सैन्य बेसहरूमा रोकिएर त्यहाँका सैनिकहरूलाई यो 'शानदार' विमान देखाउन सकियोस् भनेर यो हेरफेर गरिएको उनले दाबी गरे।
यसअघि बुधबार ट्रम्पले सामाजिक सञ्जालमा एक पोस्ट लेख्दै नयाँ विमानलाई बेलायतको मिल्डेनहल एयर फोर्स बेसमा रहेका अमेरिकी सैनिकहरूलाई 'विमान घुम्ने मौका' दिनका लागि प्रदर्शनमा राखिने भएकाले आफू अंकाराबाट 'पुरानो सम्झना ताजा गर्न' पुरानो विमानमा उड्ने उल्लेख गरेका थिए।
तर अंकारामा पत्रकारहरूले परिवर्तनको कारणबारे सोध्दा ट्रम्पले आफू इरानको पहिलो निसानामा रहेको कुरा पटक-पटक दोहोर्याएका थिए। हालैका दिनहरूमा इरानको निसानामा रहेका व्यक्तीहरूको सूची हेरेको वा त्यसबारे जानकारी पाएको उल्लेख गरेका थिए।
