नेपाली कम्युनिस्ट पार्टी (नेकपा) का सांसद वर्षमान पुनले शुक्रबार प्रतिनिधिसभा बैठकमा मुगुका युवा गणेश नेपालीको आत्मदाह प्रकरणबारे सरकारसँग जबाफ माग्दै प्रधानमन्त्री बालेन शाहको एउटा पुरानो फेसबुक स्ट्याटस पढेर सुनाए।
२०७९ माघ १० गते इलामका युवा कृषक प्रेम आचार्यले नयाँ बानेश्वरमा आत्महत्या गर्दा काठमाडौं महानगरपालिकाका तत्कालीन मेयर बालेनले सामाजिक सञ्जाल फेसबुकमा पोस्ट गरेका थिए। सांसद पुनले बालेनको त्यही पोस्ट संसद बैठकमा पढेर सुनाएका हुन्।
'गणेश नेपालीको घटनाले स्तब्ध बनाएको छ। म उहाँप्रति श्रद्धाञ्जली व्यक्त गर्छु। यो सन्दर्भमा अहिले सामाजिक सञ्जालमा भाइरल भइरहेको सम्माननीय प्रधानमन्त्रीज्यूको २६ जनवरी २०२३ को एउटा स्ट्याटस छोटोमा उद्धृत गर्न चाहन्छु,' पुनले भने, 'एक जना नागिरक आफूले देखेको प्रगतिको चाहनाका लागि सक्दो कर्म गर्छन्। एक जना नागरिक आफूले चिनेको वा जानेको सबैलाई आफ्नो विगत र आगत वर्णन गरेर आत्महत्या गर्न लागेको खबर गर्छन्। एक जना नागरिक संसद भवन अगाडि आफूमाथि पेट्रोल खन्याएर आत्मदाह गर्छन्। त्यो आत्मदाहका धेरै कारण, धेरै संकेतहरू होलान्। तर सबैभन्दा ठूलो कारण राज्य हो र सबैभन्दा भयानक संकेत राज्यको चरम असफलता हो।'
'गणेश नेपालीको आत्मदाह प्रकरणबारे पनि प्रधानमन्त्री बालेनको त्यही धारणा छ कि परिवर्तन भयो?' पुनले प्रश्न गरे।
उनले गणेश नेपालीको आत्मदाहको कारण राज्यको असफलता हो कि होइन भनेर पनि सोधे।
'प्रधानमन्त्रीज्यू नयाँ नयाँ विश्वासका साथ जनमतसहित आउनुभएको छ। के यो राज्यको असफलता हो? या गरिब, दुःखी, सुकुम्बासीहरू संघीय राजधानी वा देशभरि बाँच्न पाउँदैनन्, उनीहरूले गरिखान पाउँदैनन् भन्ने संकेत हो? सरकारको यसमा ध्यान जाओस् र जबाफ चाहन्छु। त्यही दृष्टिकोण आज छ कि आज बदलियो सत्तामा गइसकेपछि?' उनले भने।
