नेपाली कांग्रेसका महामन्त्री प्रदीप पौडेलले सञ्चार गृह अगाडि पार्किङ राखेर गरिएको अवरोधबारे विरोध गरेका छन्।
उनले सोमबार साँझ सामाजिक सञ्जालमा लेख्दै स्वतन्त्र प्रेस र लोकतान्त्रिक शक्तिहरूलाई प्रायोजित अवरोध र हर्कतले तर्साउन सकिन्छ भन्ने भ्रम नपाल्न पनि बताएका हुन्।
‘राज्यको दायित्व समस्याको दीर्घकालीन, व्यावहारिक र न्यायोचित समाधान खोज्ने हो; आफ्ना असफलता लुकाउन अराजकताको प्रायोजक बन्ने होइन। स्वतन्त्र प्रेस र लोकतान्त्रिक शक्तिहरूलाई यस्ता प्रायोजित अवरोध र हर्कतले तर्साउन सकिन्छ भन्ने भ्रम कसैले पाल्नु हुँदैन,’ उनले लेखेका छन्, ‘राज्यशक्तिको दुरूपयोग गरेर गरिएको यस्तो हर्कतको सम्बन्धित निकायले तत्काल जबाफ देओस्!’
उनले सञ्चार गृह अगाडि अवरोध पुग्ने गरी गाडी राखिएको घटना अन्त्यन्तै निन्दनीय, अराजक र सस्तो स्टन्ट भएको बताए।
‘केही दिनअघि मात्र पार्किङकै विषयमा राज्यको कठोर र अव्यावहारिक रवैयाका कारण गणेश नेपालीले आत्मदाह गर्नुपरेको हृदयविदारक घटना हाम्रो सामु छ। उक्त दुःखद् घटनापछि नागरिक र सञ्चार माध्यमले उठाएका जायज प्रश्नहरूको जबाफ दिनुको सट्टा, ‘ल हेर, पार्किङ व्यवस्थित नहुँदा कस्तो हुन्छ’ भन्ने शैलीमा राज्य संयन्त्रकै आडमा आज जुन स्तरको स्टन्ट प्रदर्शन गरियो, यसले सरकारको नियत र कार्यशैली दुवै उदाङ्गो पारेको छ,’ उनले लेखेका छन्।
