नेपाली कांग्रेसका सभापति गगन थापाले सरकार आफै प्रश्न उठाउनेहरूको आवाज दबाउने प्रयासमा लागेको आरोप लगाएका छन्।
पार्टीको एक कार्यक्रममा सोमबार सम्बोधन गर्दै उनले भने, 'सरकार आफै प्रश्न गर्नेहरूको प्रश्न बन्द गर्नका लागि ऊ आफैं ओर्लिएर आएको छ।'
उनले आफ्नो घरअगाडि सवारी साधन पार्किङ गरिएको घटनालाई त्यसैको उदाहरणका रूपमा व्याख्या गरेका हुन्।
थापाले आफ्नो घरको प्रवेशद्वारअगाडि सोमबार बिहान करिब ७ बजे दुई जना व्यक्ति आएर गाडी राखेको स्थानीयले जानकारी दिएको बताए। उनका अनुसार प्रत्यक्षदर्शीले गाडी राख्ने व्यक्ति त्यसपछि प्रशासनको गाडी चढेर गएको बताएका छन्। दिउँसो स्थानीयले यसबारे आफूलाई खबर गरेको उनले उल्लेख गरे।
उनले यो घटनालाई सामान्य पार्किङको विषय नभई सरकारबाट प्रश्न गर्नेहरूलाई तर्साउने र मुख थुन्न खोज्ने प्रयास भएको दाबी गरे।
'आज मेरो घरअगाडि गाडी राखेको होइन, त्यो मेरो मुख थुन्न खोजेको हो। त्यो तर्साएको हो। प्रश्न गरिस् भने खबरदार भन्ने सन्देश दिएको हो। किनभने त्यहाँ नागरिक आएर गाडी राखेको होइन, गाडी राख्ने मान्छे प्रशासनको गाडी चढेर गएको छ,' उनले भने।
थापाले यस्ता गतिविधि खेदजनक भएको बताउँदै यसले नेपाली कांग्रेस वा नागरिकको प्रश्न गर्ने अधिकार र हिम्मत कसैले खोस्न नसक्ने स्पष्ट पारे।
उनले पछिल्ला घटनाहरूले गम्भीर चिन्ताको विषय सिर्जना गरेको उल्लेख गर्दै यस्ता नयाँ घटना दोहोरिन नदिन सबै पक्ष गम्भीर हुनुपर्ने बताए।
थापाले नेपाली कांग्रेसको स्थापना नै निरंकुश शासन विरूद्ध प्रश्न गर्ने अधिकारको रक्षा गर्न भएको स्मरण गराउँदै जननायक बीपी कोइरालाको संघर्षको उदाहरण प्रस्तुत गरे।
'प्रश्न गर्ने समाज बनाउनकै लागि हाम्रो यत्रो समयको लडाइँ भएको हो,' उनले भने।
यसअघि कान्तिपुर पब्लिकेशन, अनलाइन खबर लगायत मिडिया अफिस अगाडि शंकास्पद गाडी पार्किङ गरिएको थियो।
