मिडिया हाउस र दलको नेताको घर अगाडि गाडी तेर्स्याउने घटनाको सांसदहरूले विरोध गरेका छन्। उनीहरूले यसलाई राज्य संरक्षित घटना भएको उल्लेख गर्दै छानबिनको माग समेत गरेका छन्।
नेकपा एमालेले मिडिया हाउसको गेटअगाडि गाडी तेर्स्याउने कार्यमा संलग्न व्यक्तिलाई कडा कारबाही गर्न माग गरेको छ।
नेकपा एमाले सांसद गणेश सिंह ठगुन्नाले मंगलबार प्रतिनिधिसभा बैठकमा मिडिया र राजनीतिक नेतृत्वको घरमा सवारी साधन तेर्स्याएर मानसिक त्रास फैलाउने काम गरेको बताए।
'हिजो मिडिया क्षेत्र र राजनीतिक नेतृत्वको घरमा सवारी साधन तेर्स्याएर मानसिक त्रास फैलाउन काम भएको छ। हेर्दा सांकेतिक सानो घटना भए पनि यसले पञ्चायतकालीन मण्डलेतन्त्रले फैलाएको आतंकको याद दिलाउँछ,' ठगुन्नाले भने, 'उक्त कार्यमा संलग्न व्यक्तिलाई कानुन बमोजिम कडा कारबाही गर्नुपर्छ।'
त्यस्तै, नेपाली कम्युनिस्ट पार्टीका रमेश मल्लले काठमाडौंको न्यूरोड र मिडिया हाउसका अगाडि सवारी साधन तेर्स्याउने कार्य राज्य संरक्षित मान्छेबाट भएको आरोप लगाए।
'हिजो र अस्ति जुन घटना राजधानीमा भए, त्यो गम्भीर कुरा छ। राज्य संरक्षित मान्छेहरूबाट न्यूरोड लगायतका सडकमा दिनभर जस्तो सडक अवरूद्ध गरियो। हिजो मिडिया हाउसको अगाडि गाडीहरू तेर्स्याइयो। प्रमुख प्रतिपक्षी दलको नेताको घर खोज्दै गएर गाडी लिएर रोकेर जाने काम भए,' मल्लले भने, 'दिनभर के कसो हो भनेर होहल्ला धेरै भयो। प्रकारान्तरमा देखियो, यो राज्य संरक्षित केही मान्छेहरूबाट गतिविधि भयो। म राज्यलाई सोध्न चाहान्छु- पाँच सयदेखि लाखौं जरिवाना गर्छु भन्ने सरकारले आज ५ सयको चिट काटेर गाडी छाड्दैछ भन्ने सुनेँ। राज्य आफैले त्रास सिर्जना गर्ने अनि पाँच सयको चिट काटेर घर पठाउने कुनै हालतमा हुन सक्दैन। लाखौंको जरिवाना तिराउनुपर्छ। गाडी जफत गर्नुपर्छ।'
मल्लले रास्वपाले मिडिया अगाडि तेर्स्याइएको घटनामा पार्टीले एउटा वक्तव्य निकालेको भए पनि त्यसले जिम्मेवारी पूरा नहुने बताए।
'सत्तारूढ दलले यो विषयलाई गम्भीर रूपमा लेओस्। त्रास र सन्त्रासको माध्यमबाट राज्य सञ्चालन गर्न सकिन्छ भन्ने यदि राज्य सञ्चालक र सरकार सञ्चालकको टाउकोमा धारणा निर्माण भएको छ भने सर्वथा गलत छ,' मल्लले भने, 'जुन जनताले मतादेश दिएका छन्। त्यही जनताले त्यो मतादेश फिर्ता लिन ठूलो मुभमेन्ट गर्ने दिन टाढा छैन।'
-1784007926.jpg)
