ठूला करदाता कार्यालयका प्रमुख कर प्रशासक केदार शर्माले राजीनामा दिएका छन्।
शर्माको राजीनामासँगै अर्थ मन्त्रालयमा चार जना सहसचिवको जिम्मेवारी हेरफेर भएको छ।
अर्थ मन्त्रालयका सहसचिव सुमन दाहाललाई राजस्व व्यवस्थापन महाशाखाको जिम्मेवारी दिइएको छ। दाहाल यसअघि बजेट महाशाखामा थिए।
हालै लुम्बिनी प्रदेशबाट अर्थ मन्त्रालयमा सरुवा भएर आएका बन्धुप्रसाद बाँस्तोलालाई बजेट महाशाखाको जिम्मेवारी दिइएको छ।
प्रेम आचार्यलाई ठूला करदाता कार्यालयको प्रमुख कर प्रशासकको जिम्मेवारी दिइएको छ।
नारायणप्रसाद रिसाललाई भन्सार विभागको उप-महानिर्देशकको जिम्मेवारी दिइएको छ। रिसाल हालै कोशी प्रदेशबाट संघमा सरूवा भएर आएका हुन्।
ठूला करदाता कार्यालयका प्रमुख कर प्रशासक शर्माले भने राजीनामा दिएका छन्। उनको राजीनामासँगै अर्थ मन्त्रालय र मातहतका निकायमा जिम्मेवारी फेरबदल भएको हो।
पछिल्लो समय निजामती सेवाका उच्च तहका कर्मचारीले राजीनामा दिने क्रम बढेको छ। प्रस्तावित ३० वर्षे सेवा अवधि वा ५५ वर्ष उमेरमा अवकाश हुने व्यवस्था आउन सक्ने आकलनका कारण कर्मचारीहरूले राजीनामा दिन थालेका हुन्।
असोज लागेपछि मात्रै चार जना सहसचिवले राजीनामा दिएका छन्। यसले उच्च तहका कर्मचारीमा प्रस्तावित अवकाशसम्बन्धी व्यवस्थालाई लिएर चासो बढेको देखाएको छ।
निजामती कर्मचारी ऐनको नयाँ प्रवधानबाट ऐन जारी हुँदाको समय ३० वर्ष सेवा अवधि वा ५५ वर्ष उमेरमध्ये जुन पहिले पुग्छ, त्यसैका आधारमा अवकाश हुने गरी तयारी गरिएको छ।
यही व्यवस्था लागू हुन सक्ने आकलनका बीच सेवा अवधि बाँकी रहेका केही कर्मचारीले राजीनामा दिन थालेका हुन्।
त्यस्तै हालसालै लोकसेवा आयोग कोशीबाट सरूवा भएका सहसचिव गोकुल बाँस्तोलालाई सहमहालेखा नियन्त्रकको जिम्मेवारी दिइएको छ। उनी उपसचिव रहदा लामो समय महालेखा नियत्रकको कार्यालयमा काम गरेका थिए।
-1746009348.jpg)
