विपक्षी दल नेपाली कम्युनिस्ट पार्टी (नेकपा)का प्रमुख सचेतक युवराज दुलालले हजार र पाँच सयका नोट बन्द गर्न सरकारलाई चुनौती दिएका छन्।
सत्तारूढ राष्ट्रिय स्वतन्त्र पार्टी (रास्वपा)का सांसद यज्ञमणि न्यौपानेले ३५ वर्षदेखि भ्रष्टाचार गरेर लुकाएर राखेको पैसा व्यवस्थापन गर्नका लागि दलहरूले संघर्ष गर्न लागेको बताउँदै नोटबन्दी गर्नुपर्ने बताएका थिए।
त्यसको जबाफ दिँदै प्रमुख सचेतक दुलालले सरकारले नोटबन्दी गरे आफ्नो दलले पनि पूर्ण समर्थन गर्ने बताएका हुन्।
‘रास्वपाको सरकारलाई अविलम्ब पुरानो हजार र पाँच सयका नोटहरूलाई नोटबन्दी गर्न माग गर्दछु। हाम्रो दलको तर्फबाट सम्पूर्ण रूपमा साथ र सहयोग हुनेछ,’ दुलालले भने।
उनले आवश्यक परे आफ्नो दलका संघीय संसदका सबै सांसदले हस्ताक्षर गरेर सहयोग गर्ने बताए।
'हाम्रो दलको तर्फबाट सम्पूर्ण रूपमा साथ र सहयोग हुनेछ। हाम्रो संघीय संसदका सबै सांसदहरूले हस्ताक्षर गरेर दिनुपरे पनि आजै दिने घोषणा गर्न चाहन्छु,' उनले भने।
उनल भ्रष्टाचार गरेर राखिएको भनिएको नोट नोटबन्दी गर्न केले छेकेको छ भनेर पनि प्रश्न गरे।
‘भ्रष्टाचार गरेर राखिएको हजार र पाँच सयको नोट नोटबन्दी गर्न तपाईंलाई के ले छेक्यो? तुरुन्त गर्नका लागि माग गर्दछु। यसका लागि रुलिङ गर्न पनि माग गर्दछु,’ उनले भने।
त्यसअघि रास्वपा सांसद न्यौपानेले ३५ वर्षदेखि देश लुटेर जम्मा गरिएको कालो धनका कारण केही मानिस शक्तिप्राप्त भएको र त्यसकै बलमा देश तथा प्राप्त जनमतविरुद्ध संघर्ष भइरहेको बताएका थिए।
‘नोटबन्दी गर्नुपर्यो सरकारले। यी नोटहरू सरकारले लिएर बैंकिङ प्रणालीमा ल्याउनुपर्यो र आवश्यक परे नयाँ नोट जारी गर्नुपर्छ,’ न्यौपानेले संसदमा भने।
उनले भ्रष्टाचार गरेर लुकाइएको पैसा बाहिर ल्याउन र देशमा सुशासन कायम गर्ने प्रयासविरुद्ध षड्यन्त्र भइरहेको र त्यो रोक्न नोटबन्दी गर्नुपर्ने बताएका थिए।
त्यसका लागि भारतबाट सिक्नुपर्ने उनको भनाइ थियो।
