नेपाली कांग्रेसका पूर्वसभापति शेरबहादुर देउवाले आफूलाई अब व्यक्तिगत रूपमा केही बन्नु नरहेकाले पार्टीका लागि अन्तिम सास रहुन्जेल संघर्ष गर्ने बताएका छन्।
शनिबार आफू पक्षको कांग्रेस ललितपुर जिल्ला अधिवेशनमा बोल्दै देउवाले आफू पाँचपटक प्रधानमन्त्री बन्नुमा पार्टीकै योगदान रहेको बताए।
पार्टीले दिएको अवसरप्रति आफ्नो जिम्मेवारी रहेको उनले बताए।
‘मलाई व्यक्तिगत रूपमा केही पाउनु छैन। तर पार्टीका लागि अन्तिम सास रहुन्जेल संघर्ष गर्नु मेरो कर्तव्य हो,’ उनले भने।
देउवाले कांग्रेस हजारौं नेता तथा कार्यकर्ताको त्याग र बलिदानबाट बनेको पार्टी भएको बताए। शहीदहरूको रगतले बनेको पार्टीलाई कसैले बन्दी बनाउन नसक्ने उनको भनाइ थियो।
‘यो पार्टी कुनै व्यक्तिले बनाएको होइन। हजारौँ नेता तथा कार्यकर्ताको त्याग, संघर्ष र बलिदानबाट निर्माण भएको पार्टी हो,’ उनले भने, ‘यो शहीदहरूको रगत र समर्पणले बनेको पार्टी हो। कसैले चाहँदैमा पार्टीको इतिहास, विचार र अस्तित्व समाप्त गर्न सक्दैन।’
उनले पार्टीको इतिहास, योगदान र बलिदानको सम्मान गर्दै कांग्रेसको संरक्षण र एकताका लागि लाग्न पनि सबैलाई आग्रह गरे।
