नेकपा (एमाले)का अध्यक्ष केपी शर्मा ओलीले इनम सापकोटाको सम्पर्क र सम्बन्ध सत्तापक्षकै व्यक्तिहरूसँग देखिएको बताएका छन्।
शनिबार पार्टीको बागमती प्रदेश कमिटी बैठकलाई सम्बोधन गर्दै अध्यक्ष ओलीले इनमलाई सत्ताधारी पार्टीले नचाएको आशंका गरेका हुन्।
‘इनम सापकोटा जताबट हेरोस् जताबट हेरो त्यो उनीहरूकै सम्पर्क, सम्बन्ध, कारोबारी, बिचौलिया जे देखिन्छ त उनीहरूकै देखिन्छ। यो के का विरुद्ध हो? यही दानबहादुरमा सिद्धियो इनाम कि अरू कुरामा पनि काम लाग्छ थाहा छैन,’ उनले भने।
उनले सरकार नै अवैधानिक क्रियाकलापबाट उत्पन्न भएका कारण यसका काम पनि सकारात्मक नहुने बताए।
‘एक ठाउँमा एउटा मूल छ, त्यो मूलको पानी खायो भने मान्छे बिरामी हुन्छ, मर्छ भन्ने चलन छ। यस्तै पानीबाट, त्यही मुहानबाट निस्केका हुन्,’ उनले भने।
उनले प्रहरी, कर्मचारी र जनताप्रति पनि असन्तुष्टि व्यक्त गरे।
अध्यक्ष ओलीले प्रहरी र सेनाको सेवा सुविधा बढाउने विषयमा आफूहरूले काम गरेको तर अहिले त्यही संगठन आफ्ना विरूद्धमा लागेको आरोप लगाए।
प्रहरी मार्ने, प्रहरीका हतियार खोस्ने, वर्दी उतार्ने, पुलिसलाई नांगो बनाएर नालीमा फाल्नेहरुलाई मालिक सम्झेर उनीहरूको आदेशमा आफूहरूमाथि प्रहार भएको उनले बताए।
‘यस्तो नहुनुपर्थ्यो नेपालमा, पुलिसले त्यस्तो गर्नुहुन्थ्यो तर गर्यो हामीसँग। म अपेक्षा गर्छु, आइन्दा त्यस्तो गर्दैन,’ उनले भने।
कर्मचारीहरूको अवस्था पनि त्यस्तै रहेको ओलीले बताए।
‘एकपल्ट कर्मचारीलाई दसैँ आए जस्तो भो, अब बल्ल चेतना खुल्दैछ,’ उनले भने।
उद्यमी व्यवसायीहरू सरकार बनेपछि सुरूमा उत्साहित भए पनि सम्पत्ति शुद्धीकरण र छानबिनका विषय आएपछि आतंकित भएको बताए।
पार्टीकै कार्यकर्तामाथि पनि ओली असन्तुष्ट सुनिए।
उनले संगठनमा पार्टीप्रति निष्ठामा गम्भीर कमि देखिएको बताए।
‘पार्टी कार्यकर्तामा कार्यकर्ता हुँ भन्नका लागि यो लक्षण उपयुक्त हुँदैन। यो लक्षण हटाउनुपर्छ र मात्रै कार्यकर्ता हुन सकेछ। पार्टीप्रतिको निष्ठा छैन भने कार्यकर्ता हुँदैन,’ उनले भने।
पार्टीप्रतिको निष्ठा निःश्वार्थ हुनुपर्ने पनि उनले बताए।
‘सर्त र स्वार्थबाट पार्टी मान्ने भनेको त त्यस्तो अवसरवादी त जति पनि भेटिन्छ, अब चुनाव आउन लाग्यो बेला त जे पनि हुन्छ,’ उनले भने।
उनले बागमती प्रदेशमा पार्टीको संगठन अत्यन्त कमजोर भएको बताए।
‘अब यो सिलसिला अन्त्य हुनुपर्छ। बागमती प्रदेश नमुना एमालेमय, एमाले प्रदेश हुनुपर्दछ। कुनै समय बागमती प्रदेश र राजधानीमा एमाले एकछत्र थियो। यतिखेर हामी यहाँ निकै नराम्ररी पछारिएका छौँ। अरूले भन्दा हामी आफैँ पछारिएका छौं,’ उनले भने।
जनता पनि हावाको भरमा कुदेको ओलीले बताए।
‘कहिलेकाहीँ जनता हावाका भरमा कुइराको काग भएर कुदेको देखिन्छ। कतिपय जिल्लाहरूमा त यो प्रवृत्ति यस्तो गहिरो छ। के काम गरेर आयो त्यो मान्छेले? खोजी छैन। के पृष्ठभूमि? खोजी छैन। के इतिहास खोजी छैन। के विचार छ, उसका राम्रा विचार के छ? त्यो पनि थाहा छैन। देश बनाउने कतै कुरा छैन,’ उनले भने।
जनताहरू लहडमा पछि लागेको उनले बताए।
‘त्यससकारण यी कुराहरूबाट जनतालाई कसरी मुक्त गर्ने? त्यो हाम्रो काम हो। भ्रममा परेर लहडमा कुदेको जनतालाई पनि हामीले सम्झाउनै पर्छ, फर्काउनै पर्छ। यो काम हामीले गर्नुपर्छ,’ अध्यक्ष ओलीले भने।
