प्रहरी महानिरीक्षक (आइजिपी) पदमा पुनर्बहालीको माग गर्दै दानबहादुर कार्कीले दिएको रिट निवेदन सर्वोच्च अदालतले बुधबार सुनुवाइ गर्ने भएको छ।
कात्तिक २० गते दायर भएको रिटको सुनुवाइका लागि सोमबारको पेसी तोकिएको थियो। तर सरकारले छठ पर्वको अवसरमा बिदा दिएपछि उक्त पेसी स्थगित भएको हो।
तिहार र छठ बिदा सकेर सरकारी कार्यालय आजदेखि सञ्चालनमा आएसँगै सर्वोच्च प्रशासनले बुधबार पेसी तोकेको हो।
कात्तिक १८ गते बसेको मन्त्रिपरिषदको बैठकले कार्कीलाई प्रहरी महानिरीक्षक पदबाट हटाएर प्रधानमन्त्रीको सुरक्षा सल्लाहकार नियुक्त गर्ने निर्णय गरेको थियो। तर कार्कीले सुरक्षा सल्लाहकारको नियुक्ति नलिई सरकारको निर्णयविरूद्ध सर्वोच्च अदालतमा रिट निवेदन पेस गरेका थिए।
सरकारले कार्कीलाई हटाएर मनोज केसीलाई नयाँ प्रहरी महानिरीक्षक नियुक्त गरेको थियो। कार्कीले आइजिपीको पदमा पनुर्बहालीको माग गरेका छन्।
यो निर्णय संविधान, कानुन र सर्वोच्च अलदालतका नजिर विपरीत रहेको भन्दै कार्कीले रिट दिएका हुन्।
कुनै कानूनी आधार र कार्यविधिबिना, स्पष्टीकरण वा सुनुवाइको अवसर नै नदिई आफूलाई कमान्ड र जिम्मेवारीबाट अलग गरेको कार्कीको रिटमा उल्लेख छ।