राष्ट्रिय प्रजातन्त्र पार्टी गण्डकी प्रदेश कार्यसमितिको पदस्थापन तथा अन्तर्क्रिया कार्यक्रममा नेपालको पुरानो राष्ट्रिय गान 'श्रीमान् गम्भीर नेपाली' बजाएको पाइएको छ।
पोखराको अमरसिंह चोकस्थित सफल ब्याङ्क्वेटमा सोमबार (कात्तिक ३०) गते आयोजित कार्यक्रममा अहिलेको संविधानले मान्यता नदिने राजतन्त्र कायम रहेको समयको राष्ट्रिय गान बजाइएपछि पार्टीभित्रैबाट पनि आलोचना भएको छ।
कार्यक्रममा पूर्वमन्त्रीहरू कमल थापा, प्रकाशचन्द्र लोहनी र विक्रम पाण्डे तथा संसदीय दलका नेता ज्ञानेन्द्र शाही सहितका नेताहरू सहभागी थिए।
वि.सं. २०१८ मंसिर ३० गतेदेखि प्रचलनमा आएको 'श्रीमान् गम्भीर नेपाली' राष्ट्रिय गान लोकतान्त्रिक गणतन्त्र स्थापनापछि २०६३ जेठमा निलम्बन गरिएको थियो।
त्यसपछि २०६४ साउन १८ गते 'सयौं थुँगा फूलका हामी' लाई नेपालको नयाँ राष्ट्रिय गान लागू गरिएको हो।
नेपालको संविधान २०७२ को अनुसूची २ अनुसार अहिले पनि यही राष्ट्रिय गान लागू छ।
तर, संसदमा प्रतिनिधित्व गर्ने राप्रपाको कार्यक्रममा पुरानो राष्ट्रिय गान बजाइएपछि पार्टीभित्रै असन्तुष्टि देखिएको छ।
पार्टीका एक पदाधिकारीले मन्त्री भइसकेका वरिष्ठ नेताहरूकै उपस्थितिमा यस्तो गतिविधि हुनु दुःखद भएको टिप्पणी गरेका छन्।
'कमल थापा, प्रकाशचन्द्र लोहनी र विक्रम पाण्डे पटकपटक राजकीय पदमा पुगिसक्नुभएका नेताहरू हुनुहुन्छ। ज्ञानेन्द्र शाही पनि दोस्रो पटक सांसद भइसकेको नेता हो। तर उहाँहरू नै सहभागी कार्यक्रममा यो उदण्डता किन रोक्न सक्नु भएन?' ती पदाधिकारीले सेतोपाटीसँग भने, 'पार्टी अब यो छलफलको विषय बन्छ।'
राप्रपा कार्यक्रममा पुरानो राष्ट्रिय गान-
सरकारले राष्ट्रिय झण्डा र राष्ट्रिय गानको प्रयोगसम्बन्धी कार्यविधि २०६९ जारी गरेको छ।
उक्त कार्यविधिअनुसार प्रमुख जिल्ला अधिकारीले आफ्नो क्षेत्रभित्र राष्ट्रिय गानको प्रयोग निर्धारित व्यवस्थाअनुसार भए/नभएको अनुगमन गर्न सक्ने व्यवस्था छ।
यसबारे कास्कीका प्रमुख जिल्ला अधिकारी कुमार सिंह गुरूङलाई जिज्ञासा राख्दा राप्रपा कार्यक्रममा पुरानो राष्ट्रिय गान बजाइएको हो वा होइन र बजाइएको भए किन बजाइयो भन्नेबारे सम्बन्धित पार्टीसँग सोधखोज गर्ने बताए।
'कार्यक्रममा पुरानो राष्ट्रिय गान बजाइयो वा बजाइएन, बजाएको भए किन बजाइयो भनेर म सोधखोज गर्छु,' उनले सेतोपाटीसँग भने।
कार्यक्रममा सहभागी राप्रपा प्रवक्ता तथा संसदीय दलका नेता ज्ञानेन्द्र शाहीले भने 'श्रीमान् गम्भीर नेपाली' पनि राष्ट्रिय गान भएको जिकिर गर्दै बजाउन मिल्ने प्रतिक्रिया दिए।
'अहिलेको राष्ट्रिय गानमा हाम्रो कुनै अपमान छैन। श्रीमान् गम्भीर नेपाली पनि पुरानो राष्ट्रिय गान नै हो। पहिला पहिला पनि अरू गान थिए होला। राजसंस्था चाहिन्छ भन्ने पार्टी राप्रपाको कार्यक्रम भएकाले श्रीमान् गम्भीर नेपाली राष्ट्रिय गान बजाएका हौं,' संसदीय दल नेता शाहीले सेतोपाटीसँग भने।
शाहीले नयाँ राष्ट्रिय गानप्रति पनि कुनै आपत्ति नरहेको बताउँदै पार्टी कार्यक्रममा पुरानो राष्ट्रिय गानसमेत बजाउनुपर्ने धारणा राखे।
'राजसंस्था चाहिन्छ भन्नेहरूको राष्ट्रिय गान त श्रीमान् गम्भीर नेपाली भन्ने नै हो नि! तर नयाँ राष्ट्रिय गानमा हाम्रो कुनै आपत्ति छैन। पुरानो राष्ट्रिय गान पनि बजाउनुपर्छ किनभने राजाबिना यो देश हुन्न,' उनले भने।
राजेन्द्र लिङ्देन नेतृत्वको राप्रपाले संवैधानिक राजसंस्थाको पुन:स्थापना र वैदिक सनातन हिन्दु राष्ट्रको घोषणालाई मुख्य राजनीतिक एजेन्डा बनाउँदै आएको छ। साथै राष्ट्रिय एकता / प्रदेश संरचना खारेजीको नीति लिएको देखिन्छ।