युक्रेनी राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनलाई ‘हत्यारा’ भनेका छन्।
अमेरिकी राष्ट्रपति डोनाल्ड ट्रम्पले चीनमा भएको भेटका क्रममा पुटिनलाई आफ्नो ‘मित्र’ भनेपछि जेलेन्स्कीको यस्तो प्रतिक्रिया आएको हो।
सिएनएनसँगको अन्तर्वार्तामा जेलेन्स्कीले पुटिनलाई के भनेर सम्बोधन गर्ने भन्ने कुरा ट्रम्पको व्यक्तिगत निर्णय भए पनि युक्रेनका लागि उनी शत्रु र हत्यारा भएको बताए।
‘ट्रम्पले पुटिनलाई कसरी सम्बोधन गर्नुहुन्छ, त्यो उहाँको कुरा हो। तर हाम्रा लागि उनी शत्रु हुन्, हत्यारा हुन्,’ जेलेन्स्कीले भने।
चिनियाँ राष्ट्रपति सी चिनफिङ र पुटिनसँगको त्रिपक्षीय भेट हुनुअघि ट्रम्पले पुटिनलाई आफ्नो मित्र भन्दै उनीहरूबीच धेरै वर्षदेखि राम्रो सम्बन्ध रहेको बताएका थिए।
शुक्रबार ह्वाइट हाउसमा पत्रकारहरूसँग कुरा गर्दै उनले पुटिन युद्ध अन्त्य गर्न चाहेको पनि बताएका थिए।
‘उनीहरू (जेलेन्स्की र पुटिन) दुवै युद्ध अन्त्य गर्न चाहन्छन्। उनीहरूसँग मेरो सम्बन्ध राम्रो हुनु पनि सकारात्मक कुरा हो,’ ट्रम्पले भनेका थिए।
सेन्जेनमा पुटिनसँग भेटका लागि हलमा प्रवेश गर्ने क्रममा पनि ट्रम्पले उनलाई आफ्नो मित्र भनेका थिए।
तर, जेलेन्स्कीले ट्रम्पले पुटिनलाई मित्रका रूपमा सम्बोधन गर्दा उनीमाथि पर्याप्त दबाब नपरेको देखिने टिप्पणी गरे।
‘विश्वका धेरै मानिसका लागि उनी हत्यारा हुन्। किनभने उनी हरेक दिन र रात मानिसको हत्या गरिरहेका छन्,’ जेलेन्स्कीले भने।
यसैबीच, रुसले युक्रेनमाथि आक्रमण जारी राखेको छ।
शुक्रबार युक्रेनको राजधानी किएभसहित विभिन्न क्षेत्रमा भएका रुसी आक्रमणमा कम्तीमा नौ जनाको मृत्यु भएको थियो।
पुल र पश्चिमी युक्रेनका रेल स्टेसनलाई लक्षित गरी गरिएको उक्त आक्रमणमा ११० वटा क्षेप्यास्त्र, त्यसमध्ये २७ वटा ब्यालिस्टिक क्षेप्यास्त्र र ४०० भन्दा बढी ड्रोन प्रयोग भएको जेलेन्स्कीले बताएका थिए।
उनले यसलाई यस वर्षकै ठूलो आक्रमण भनेका थिए।
त्यसपछि पनि रूसी आक्रमण जारी रह्यो।
जेलेन्स्कीको गृहनगर क्रिभी रिहमा भएको क्षेप्यास्त्र र ड्रोन आक्रमणमा एक बालकसहित दुई जनाको मृत्यु भएको छ भने ५२ जना घाइते भएका छन्। खार्किभ क्षेत्रमा ११ जना र रिभ्नेमा एक जना घाइते भएको युक्रेनको राज्य आपत्कालीन सेवाले जनाएको छ।
रुसले युक्रेनमाथि आक्रमण गरिरहेका बेला छिमेकी पोल्यान्डले पनि आफ्नो हवाई क्षेत्रमा रुसी क्षेप्यास्त्र प्रवेश गरेको जनाएको छ।
शुक्रबार बिहान दक्षिणपूर्वी पोल्यान्डको हवाई क्षेत्रमा प्रवेश गरेका तीन वस्तुमध्ये एउटा रुसी क्रुज क्षेप्यास्त्र भएको पोल्यान्डका प्रधानमन्त्री डोनाल्ड टस्कले बताएका थिए।
पोल्यान्डका रक्षामन्त्री व्लादिस्लाव कोसिनियाक-कामिसका अनुसार उक्त क्षेप्यास्त्र युक्रेनको सीमाबाट करिब ५० किलोमिटर टाढा नोवी लिपोविच क्षेत्रमा खसेको थियो। अन्य दुई स्थानमा अर्को क्रुज क्षेप्यास्त्र र जेट इन्जिनयुक्त ड्रोन खसेको आशंका गरिएको छ।
घटनामा मानवीय क्षति वा भौतिक नोक्सानी भएको छैन। तर पोल्यान्डले यसलाई रुसको ‘उक्साहट’ भनेको छ। नेटोका महासचिव मार्क रुटेले पोल्यान्डको हवाई क्षेत्रमा भएको गम्भीर उल्लंघनको निन्दा गर्दै त्यसको जवाफमा नेटोका लडाकु विमान परिचालन गरिएको बताएका छन्।
शनिबार बिबिसीसँग कुरा गर्दै पोल्यान्डका विदेशमन्त्री रादोस्लाव सिकोर्स्कीले क्षेप्यास्त्रमा आफ्नै दिशा पहिचान गर्ने प्रणाली भएकाले युक्रेनको विद्युतीय युद्ध प्रणालीका कारण बाटो बिराएको सम्भावना निकै कम रहेको बताए।
रुसले भने आफ्नो क्षेप्यास्त्र पोल्यान्डको हवाई क्षेत्रमा प्रवेश गरेको घटनाबारे कुनै प्रतिक्रिया दिएको छैन।
रुसी राष्ट्रपति पुटिनले सन् २०२२ फेब्रुअरीमा युक्रेनमाथि पूर्णस्तरको सैन्य आक्रमण सुरु गरेका थिए। त्यसयता जारी युद्ध अन्त्य गर्ने विषयमा विभिन्न कूटनीतिक प्रयास भए पनि लडाइँ रोकिएको छैन।