मन्त्रीको गाडी आगजनी घटनामा ५४ जनालाई प्रहरीले लियो नियन्त्रणमा

सेतोपाटी संवाददाता

काठमाडौं, पुस १३

ललितपुरको ग्वार्कोमा मन्त्रीको गाडी आगजनी गरेको घटनामा प्रहरीले ५४ जनालाई नियन्त्रणमा लिएको छ।

शुक्रबार दिउँसो ललितपुरको ग्वार्को-बालकुमारी सडक खण्डमा भौतिक, पूर्वाधार तथा यातायात मन्त्री प्रकाश ज्वालाको गाडीमा आगजनी गरेपछि प्रहरीले ५४ जनालाई नियन्त्रणमा लिएको जिल्ला प्रहरी परिसर ललितपुरका एसपी नवराज कार्कीले जानकारी दिए।

कोरियाली भाषा परीक्षामा आवेदनसम्बन्धी विषयमा प्रदर्शनकारीहरूले मन्त्री ज्वाला चढ्ने बा २ झ ५८६१ नम्बरको सरकारी गाडीमा आगजनी गरेपछि प्रहरीले बल प्रयोग गरेको थियो।

बल प्रयोग गर्दा घाइते भएका एक जनाको इमाडोलस्थित किष्ट अस्पतालमा एक जनाको मृत्यु भएको अस्पतालका चिफ अपरेटिङ अफिसर अमिश पाठकले जानकारी दिए।

मृत्यु हुनेमा २३ वर्षीय सुजन रावत छन्। रावत बालकुमारी क्षेत्रको सडकमै लडिरहेको अवस्थामा फेला परेपछि उनलाई उपचारका लागि अस्पताल लगिएको थियो।

रावतको छातीमा निलडाम देखिएको चिफ अपरेटिङ अफिसर पाठकले बताए। रावतको शुक्रबार दिउँसो करिब पौने २ बजेतिर मृत्यु भएको हो।

अस्पताल पुर्‍याएपछि उनलाई ४५ मिनेट जति सिपिआर दिइएको थियो। रावत जुम्लाका हुन्। उनी भक्तपुर क्षेत्रमा बस्दै आएका थिए।

अर्को एक जना पनि घाइते भएका छन्। उनको उपचारको लागि पाटन अस्पतालमा लगिएको छ।

प्रहरीले अझै पनि घटनामा संलग्नको खोजी गरिरहेको छ। प्रहरीले आन्दोलनकारीमाथि अश्रुग्यास र गोलीसमेत चलाएको थियो।

यो पनि:

मन्त्रीको गाडी आगजनी घटना: एक युवकको मृत्यु

मन्त्रीको गाडी आगजनी घटनामा १७ जना पक्राउ, प्रहरीले चलायो गोली

मन्त्रीको गाडीमा आगजनीपछि ग्वार्को तनावग्रस्त, प्रहरीले हान्यो अश्रुग्यास (तस्बिरहरू)

बालकुमारीमा मन्त्री ज्वालाको गाडीमाथि आगजनी (तस्बिरहरू)

प्रदर्शनकारीले मलाई निकालेर गाडीमा आगो लगाएः मन्त्री ज्वाला