बाँके प्रहरीले साढे १० ग्राम बढी लागुऔषध ब्राउन सुगरसहित नेपाली सेनाका एक जना जवानलाई पक्राउ गरेको छ।
जिल्लाको बैजनाथ गाउँपालिका–३ का २६ वर्षीय सन्जु आले बुधबार बेलुकी ६ बजेतिर आफ्नै घरबाट पक्राउ परेको जिल्ला प्रहरी प्रवक्ता दीपक पातलीले बताए।
सुराकका आधामा पुगेको लागुऔषध नियन्त्रण ब्युरो शाखा कार्यालय नेपालगन्ज र इलाका प्रहरी कार्यालय कोहलपुरबाट संयुक्त रूपमा खटिएको सादा पोशाकका प्रहरीले आलेलाई पक्राउ गरेको हो।
उनको घरको कोठाबाट १० ग्राम ६०० मिली ग्राम ब्राउन सुगर बरामद भएको डिएसपी पातलीले सेतोपाटीलाई बताए।
इलाका प्रहरी कार्यालय कोहलपुरकी प्रमुख डिएसपी लक्ष्मी खनालका अनुसार पक्राउ परेका आले नेपाली सेनाका जवान हुन्।
उनीबाट फेला परेको नेपाली सेनाको परिचय पत्रका आधारमा उनी हाल जगदल गण काठमाडौंमा कार्यरत रहेको खुलेको हो। प्रारम्भिक अनुसन्धानका क्रममा पक्राउ परेका आलेले आफू घर बिदामा घर आएको बयान गरेको डिएसपी खनालले बताइन्। तर, उनी भागेर घर आएको हुनसक्ने प्रहरीको आशंका छ।
डिएसपी खनालका अनुसार आले कार्यरत गणमा पत्राचार भइसकेको छ।
गणबाट आधिकारिक रुपमा जानकारी आएपछि तथ्य खुल्ने डिएसपी खनालले बताइन्।
पक्राउ परेका व्यक्तिबारे अनुसन्धान जारी रहेको तथा म्याद थप गर्ने तयारी रहेको प्रहरीले जनाएको छ।
-1746009348.jpg)
