कोदारीमा यसरी भइरहेको छ पहिरो रोकथामको काम (तस्बिरहरू)

सेतोपाटी संवाददाता

काठमाडौं, असोज ८

नेपाल चीनबीचको प्रमुख व्यापारिक मार्ग बाह्रबिसे तातोपानी सडक खण्डमा वर्षौंदेखि स्थानीय र व्यापारीहरूले सास्ती भोग्दै आउनु परेको छ।

देशकै प्रमुख व्यापारिक मार्गको रूप रहेको सो सडकको विभिन्न क्षेत्रमा पहिरो खस्दा लाखौं मालसामान सीमा क्षेत्रमा रोकिनु परेको छ।

२०७२ सालको भूकम्प र कोरोना महामारीपछि बन्दको अवस्थामा रहेको सो नाका रसुवाको केरूङ नाका बाढीले क्षति पुर्याएसँगै पुन: लयमा फर्किएको भए पनि कोदारी पहिरो, दाकलाङ लगायत विभिन्न क्षेत्रमा गएको पहिरोमा कारण निर्धक्क रूपमा यात्रा गर्न सकिने अवस्थामा भने छैन।

प्रमुख व्यापारी मार्ग भए पनि नेपाल सरकारबाट आवश्यक बजेट विनियोजन नहुँदा हरेक वर्ष पहिरो झेल्नु परेको स्थानीयहरू बताउँछन् ।

भोटेकोशी गाउँपालिकामा २ नं. वडा चौकीडाँडाका स्थानीय कृष्ण बहादुर राईका अनुसार कोदारी पहिरोले हरेक वर्ष असार साउन महिनादेखि दुःख दिने, हिउँदको समयमा पहिरो रोकथामका लागि स्थानीय सरकार, सङ्घ र प्रदेश सरकारले खासै ध्यान नदिएको कारण अहिले सुख भोग्नु परेको बताए।

सो पहिरोले सडक मात्र नभएर ३‌ सय जति घरधुरी समेत जोखिम रहेको उनले जनाए।

स्थानीयले हरेक पटक पहिरो रोकथाम र बाटो मर्मतका लागि माग राखे पनि कहीँकतैबाट सुनुवाइ नभएको राईले जानकारी दिए।

स्थानीय अर्जुन धतानेका अनुसार कोदारी पहिरो २०३८ सालबाटै सुरू भएको पनि हालसम्म प्रभावकारी रूपमा नियन्त्रणको काम नभएको बताए।

मुख्य नाका भएको हुनाले सरकारले यसको रोकथाम र नियन्त्रणको कामलाई प्रभावकारी रूपमा कार्यान्वयन गर्नुपर्ने भए पनि हालसम्म त्यस्तो केही नगरेको उनले बताए।

हरेक वर्ष पहिरोले बाटो बन्द हुने अवस्था छ तै पनि सम्बन्धित निकायको ध्यान नगएको उनको गुनासो छ।

हाल अस्थायी रूपमा पहिरो नियन्त्रण, रोकथाम र सहज रूपमा सडक सञ्चालनका लागि ग्राभेल हाल्ने, पानीका मुहालहरूलाई ट्र्याप गरी सेफ ठाउँमा पठाउने र ढुङ्गा बिछ्याउने काम भइरहेको सडक डिभिजन चरिकोटका सब इन्जिनियर रामकृष्ण रिमालले जानकारी दिए।

धेरै पुरानो पहिरो भएका कारण तत्कालै नियन्त्रण गर्न नसके पनि अहिले अस्थायी रूपमा सडक संचालन र पहिरो रोकथामको काम भइरहेको उनले बताए।

तस्बिरहरू:

kodari-sadak-(14)-1758701417.jpg