नेपालको मौसम प्रणालीमा मनसुनी वायुको प्रभाव रहिरहँदा दसैं अवधिभर पानी पर्ने सम्भावना बनेको छ। जल तथा मौसम विज्ञान विभागले दसैं बुलेटिन जारी गर्दै अष्टमी, नवमी र दसमीका दिन पानी पर्ने सम्भावना औंल्याएको हो।
‘नेपालमा हाल मनसुन वायुको प्रभाव केही कमजोर रहेको र नेपालबाट मनसुन बहिर्गमन भइनसकेको अवस्था छ हालको मौसम विश्लेषणअनुसार यस वर्षको दसैं अवधिभर मनसुनी वायुको प्रभाव रहिरहने देखिन्छ,’ विभागले भनेको छ।
नेपालमा सरदरमा अक्टोबर २ (असोज १६) तारिखमा मनुसन बहिर्गमन हुने भए तापनि प्रत्यक वर्ष सो मिति भने फरक फरक हुने गरेको विभागले बताएको छ।
विभागका अनुसार असोज १४ गते अष्टमीका दिन बागमती र गण्डकी प्रदेशका पहाडी तथा कोशी प्रदेशका पहाडी र तराई भू–भागका केही स्थानहरूमा हल्कादेखि मध्यम वर्षा प्रक्षेपण गरिएको छ।
असोज १५ गते महानवमीका दिन कोशी, बागमती र गण्डकी प्रदेशका पहाडी भू–भागका केही स्थानहरूमा हल्कादेखि मध्यम वर्षाको सम्भावना रहेको विभागले जानकारी दिएको छ।
असोज १६ गते टीकाको दिन बागमती, गण्डकी, लुम्बिनी र कर्णालीका पहाडी तथा कोशी प्रदेशका पहाडी र तराई भू–भागका केही स्थानहरूमा साथै मधेस र सुदूरपश्चिम प्रदेशको थोरै स्थानहरूमा हल्कादेखि मध्यम वर्षाको सम्भावना रहेको छ।
मौसमविद् विनोद पोखरेलले पनि दसैंमा पानी पर्ने सम्भावना औंल्याएका छन्।
उनले दसैंपछि पनि भीषण वर्षाको सम्भावना देखिएकोसमेत उल्लेख गरेका छन्। विभिन्न मोडल अध्ययन गरेर वर्षा प्रक्षेपण गर्दै आएका उनले मनसुनको उत्तरार्द्धमा भारी वर्षा हुने औंल्याएका हुन्।
‘यो वर्ष नेपाललाई मनसुन आउँदा पनि दुःख दियो पानी नपरेर र मनसुन जाने बेलामा पनि भीषण वर्षा गराएर जाला भन्ने पो डर भयो,’ उनले भनेका छन्, ‘अहिलेको पूर्वानुमान हेर्दा अक्टोबर ४ ( असोज १८ गतेदेखि अक्टोबर ७ (असोज २१ गते) सम्म भारी वर्षाको सम्भावना देखाएको छ,’ उनले भनेका छन्। गत वर्ष पनि मनसुन बहिर्गमन हुने बेला (असोज १० गतेदेखि १३ गतेसम्म) भीषण वर्षा भएको थियो। २०७८ सालमा त मनसुन बहिर्गमन भएपछि भएको ठूलो वर्षाले सुदूरपश्चिम, लुम्बिनी र मधेस प्रदेशमा समेत भित्र्याउन लागेको धानबालीमा गम्भीर असर पुर्याएको थियो।
नेपालमा मनसुन याम सामान्यतया जेठ १८ देखि असोज १८ गतेसम्मलाई बुझिने गर्छ। यसअवधिमा सरदर १४७२ मिलिमिटर वर्षा हुने गरेकामा यसवर्ष औसतभन्दा कम नै वर्षा भएको छ। यद्यपि मनसुन बाहिरिन केही समय बाँकी छ। यसवर्ष सरदरभन्दा १५ दिनअगावै मनसुनको आगमन भएको थियो।
-1746009348.jpg)
